faza-e-shahr ki nabz-e-KHiram baiTh gai

fazā-e-shahr kī nabz-e-ḳhirām baiTh ga.ī

fasīl-e-shab pe diyā le ke shaam baiTh ga.ī

vo dhuul jis ko haTāyā thā apne chehre se

vo ā.inoñ pe pa.e intiqām baiTh ga.ī

guzarne vaalā hai kyā raushnī kā shahzāda

jo baal khol ke raste meñ shaam baiTh ga.ī

sitam kī dhuup meñ aisā vo ik shajar to hai

ki jis ke saa.e meñ duniyā tamām baiTh ga.ī

maiñ kis nasheb meñ terā lahū talāsh karūñ

tamām dasht pe ḳhāk-e-ḳhiyām baiTh ga.ī

bahut tavīl safar kā thā azm ai 'kāzim'

hayāt chal ke magar chand gaam baiTh ga.ī

faza-e-shahr ki nabz-e-KHiram baiTh gai

fasil-e-shab pe diya le ke sham baiTh gai

wo dhul jis ko haTaya tha apne chehre se

wo aainon pe pae intiqam baiTh gai

guzarne wala hai kya raushni ka shahzada

jo baal khol ke raste mein sham baiTh gai

sitam ki dhup mein aisa wo ek shajar to hai

ki jis ke sae mein duniya tamam baiTh gai

main kis nasheb mein tera lahu talash karun

tamam dasht pe KHak-e-KHiyam baiTh gai

bahut tawil safar ka tha azm ai 'kazim'

hayat chal ke magar chand gam baiTh gai