faza-e-shahr ko wahshat-asar taslim karte hain

fazā-e-shahr ko vahshat-asar taslīm karte haiñ

diloñ meñ chhap ke baiThā hai jo Dar taslīm karte haiñ

hamāre ghar kī tanhā.ī pe puurā haq hamārā hai

use ham apne āñgan kā shajar taslīm karte haiñ

jo sach pūchho to ab vo shai nahīñ apne Thikāne par

ye ham haiñ jo use ab tak idhar taslīm karte haiñ

mirī shorīdgī mujh ko kahīñ thamne nahīñ detī

bhañvar mujh ko ba-zāt-e-ḳhud bhañvar taslīm karte haiñ

hamārī zaat se sanjīdgī kā ḳhol utrā hai

ye terī dil-navāzī kā asar taslīm karte haiñ

ham in mahtāb chehroñ ke jilau meñ ghūmne vaale

tirī yādoñ ko apnā ham-safar taslīm karte haiñ

vabā jo shahr meñ phailī hai vo rukne nahīñ vaalī

samajhte haiñ hamāre chārāgar taslīm karte haiñ

kisī insān se apnī tabī.at mil nahīñ saktī

sab apne aap ko farruḳh-siyar taslīm karte haiñ

tirī qudrat ke aage bas nahīñ chaltā kisī shai kā

tire bande tire muhtāj-e-dar taslīm karte haiñ

ajab zauq-e-nazāra dīda-e-purnam ne baḳhshā hai

ziyā-e-ashk ko āb-e-guhar taslīm karte haiñ

maiñ apnī shā.erī se mutma.in hotā nahīñ 'yāvar'

agarche mujh ko sab ahl-e-hunar taslīm karte haiñ

faza-e-shahr ko wahshat-asar taslim karte hain

dilon mein chhap ke baiTha hai jo Dar taslim karte hain

hamare ghar ki tanhai pe pura haq hamara hai

use hum apne aangan ka shajar taslim karte hain

jo sach puchho to ab wo shai nahin apne Thikane par

ye hum hain jo use ab tak idhar taslim karte hain

meri shoridgi mujh ko kahin thamne nahin deti

bhanwar mujh ko ba-zat-e-KHud bhanwar taslim karte hain

hamari zat se sanjidgi ka KHol utra hai

ye teri dil-nawazi ka asar taslim karte hain

hum in mahtab chehron ke jilau mein ghumne wale

teri yaadon ko apna ham-safar taslim karte hain

waba jo shahr mein phaili hai wo rukne nahin wali

samajhte hain hamare chaaragar taslim karte hain

kisi insan se apni tabiat mil nahin sakti

sab apne aap ko farruKH-siyar taslim karte hain

teri qudrat ke aage bas nahin chalta kisi shai ka

tere bande tere muhtaj-e-dar taslim karte hain

ajab zauq-e-nazara dida-e-purnam ne baKHsha hai

ziya-e-ashk ko aab-e-guhar taslim karte hain

main apni shaeri se mutmain hota nahin 'yawar'

agarche mujh ko sab ahl-e-hunar taslim karte hain