faza-e-zauq-e-tamasha hai sar-basar mahdud

fazā-e-zauq-e-tamāshā hai sar-basar mahdūd

vasī.a dā.era-e-husn aur nazar mahdūd

nafas kī garm-ravī barq kā tabassum thī

milī bhī fursat-e-hastī to kis qadar mahdūd

vahāñ zuhūr-e-tajallī ko chāhiye ik umr

yahāñ ye ālam-e-hastī ki sar-basar mahdūd

ba-qadr-e-zauq-e-tapish ruḳhsat-e-tapish na milī

bisāt-e-ālam-e-imkāñ hai kis qadar mahdūd

mushāhidāt kī had se guzar sakī na nigāh

taḳhaiyyulāt kī duniyā hai sar-basar mahdūd

mire gunāhoñ kī vus.at ko dekhne vaale

tū apne sheva-e-altāf ko na kar mahdūd

nigāheñ kyā hoñ haqīqat se āshnā 'farruḳh'

ta.ayyunāt se hai vus.at-e-nazar mahdūd

faza-e-zauq-e-tamasha hai sar-basar mahdud

wasia daera-e-husn aur nazar mahdud

nafas ki garm-rawi barq ka tabassum thi

mili bhi fursat-e-hasti to kis qadar mahdud

wahan zuhur-e-tajalli ko chahiye ek umr

yahan ye aalam-e-hasti ki sar-basar mahdud

ba-qadr-e-zauq-e-tapish ruKHsat-e-tapish na mili

bisat-e-alam-e-imkan hai kis qadar mahdud

mushahidat ki had se guzar saki na nigah

taKHaiyyulat ki duniya hai sar-basar mahdud

mere gunahon ki wusat ko dekhne wale

tu apne shewa-e-altaf ko na kar mahdud

nigahen kya hon haqiqat se aashna 'farruKH'

tayyunat se hai wusat-e-nazar mahdud