faza-e-zehn ki jalti hawa badalne tak

fazā-e-zehn kī jaltī havā badalne tak

maiñ bujh na jā.ūñ lihāf-e-anā badalne tak

charāġh-e-jism meñ is baar bujh na jā.ūñ maiñ

havā-e-ḳhema-e-shab kī ridā badalne tak

phir aaj kuufe se hijrat bahut zarūrī hai

palaT ke ā.eñge āb-o-havā badalne tak

ajiib log haiñ duniyā tirī havas ke liye

tule hue haiñ ḳhud apnā ḳhudā badalne tak

kashīd karte haiñ zindāñ kī vādiyoñ se umiid

qafas badalne haiñ zanjīr-e-pā badalne tak

usuul kaañp rahe the badan kī bhaTTī meñ

qanā.atoñ kī mukammal fazā badalne tak

mire lahū kā namak chakh liyā hai us ne bhī

vo ḳhush rahegā bahut zā.iqa badalne tak

safed barf pe nāchī bahār jī-bhar ke

nizām-e-qudrat-e-kohna kī jā badalne tak

faza-e-zehn ki jalti hawa badalne tak

main bujh na jaun lihaf-e-ana badalne tak

charagh-e-jism mein is bar bujh na jaun main

hawa-e-KHema-e-shab ki rida badalne tak

phir aaj kufe se hijrat bahut zaruri hai

palaT ke aaenge aab-o-hawa badalne tak

ajib log hain duniya teri hawas ke liye

tule hue hain KHud apna KHuda badalne tak

kashid karte hain zindan ki wadiyon se umid

qafas badalne hain zanjir-e-pa badalne tak

usul kanp rahe the badan ki bhaTTi mein

qanaaton ki mukammal faza badalne tak

mere lahu ka namak chakh liya hai us ne bhi

wo KHush rahega bahut zaiqa badalne tak

safed barf pe nachi bahaar ji-bhar ke

nizam-e-qudrat-e-kohna ki ja badalne tak