faza mein bikhre hue rang jhilmilate kya

fazā meñ bikhre hue rañg jhilmilāte kyā

vahī havā thī charāġhoñ ko phir jalāte kyā

shikasta jism thā sūraj kā qahr jhele hue

baraste abr ke chhīñTe hameñ jagāte kyā

tamām daur kī lahreñ thiiñ ḳhvāb kī sūrat

bajā thī pyaas sarāboñ meñ Duub jaate kyā

har ek lamha thā apne hī aks se dhundlā

guzarte vaqt ko ham aa.ina dikhāte kyā

laboñ pe jam ga.ī dīvār-o-dar kī ḳhāmoshī

tamām shahr thā vīrāñ sadā lagāte kyā

yahāñ bhī kis ko thī ummīd paar utarne kī

nadī jo raah meñ miltī to lauT aate kyā

bhaTak rahe haiñ zamāne se ġham ke sahrā meñ

ab aur us kī sadā kā fareb khāte kyā

tamām umr guzārī ravāñ-davāñ 'rāshid'

the barg-e-ḳhushk kahīñ par qadam jamāte kyā

faza mein bikhre hue rang jhilmilate kya

wahi hawa thi charaghon ko phir jalate kya

shikasta jism tha suraj ka qahr jhele hue

baraste abr ke chhinTe hamein jagate kya

tamam daur ki lahren thin KHwab ki surat

baja thi pyas sarabon mein Dub jate kya

har ek lamha tha apne hi aks se dhundla

guzarte waqt ko hum aaina dikhate kya

labon pe jam gai diwar-o-dar ki KHamoshi

tamam shahr tha viran sada lagate kya

yahan bhi kis ko thi ummid par utarne ki

nadi jo rah mein milti to lauT aate kya

bhaTak rahe hain zamane se gham ke sahra mein

ab aur us ki sada ka fareb khate kya

tamam umr guzari rawan-dawan 'rashid'

the barg-e-KHushk kahin par qadam jamate kya