faza mein bu-e-gul-emushk-bar hai ki nahin

fazā meñ bū-e-gul-emushk-bār hai ki nahīñ

havā ke dosh pe paiġhām-e-yār hai ki nahīñ

savāl ye nahīñ vo dost-dār hai ki nahīñ

suḳhan-shanās dil-e-ġham-gusār hai ki nahīñ

karo na zikr subū zar-nigār hai ki nahīñ

ilāj-e-tishnagī-e-bāda-ḳhvār hai ki nahīñ

kisī gadā-e-gurasna ko hai ye hosh kahāñ

koī nigār lab-e-jūebār hai ki nahīñ

kiyā hai azm-e-safar ab nahīñ taraddud kuchh

kahīñ koī shajar-e-sāya-dār hai ki nahīñ

hai ustuvārī-e-āshiq kī bas yahī pahchān

rah-e-vafā meñ ravāñ sū-e-dār hai ki nahīñ

agar ho rizq kā aajir pe inhisār to ye

ḳhilāf-e-va.ada-e-parvardigār hai ki nahīñ

chaman hai jin ke tasarruf meñ un se ye pūchho

lahū hamārā sharīk-e-bahār hai ki nahīñ

kashākash-e-rah-e-hastī se tū pareshāñ hai

haqīqatoñ se ye 'nazmī' farār hai ki nahīñ

faza mein bu-e-gul-emushk-bar hai ki nahin

hawa ke dosh pe paigham-e-yar hai ki nahin

sawal ye nahin wo dost-dar hai ki nahin

suKHan-shanas dil-e-gham-gusar hai ki nahin

karo na zikr subu zar-nigar hai ki nahin

ilaj-e-tishnagi-e-baada-KHwar hai ki nahin

kisi gada-e-gurasna ko hai ye hosh kahan

koi nigar lab-e-juebar hai ki nahin

kiya hai azm-e-safar ab nahin taraddud kuchh

kahin koi shajar-e-saya-dar hai ki nahin

hai ustuwari-e-ashiq ki bas yahi pahchan

rah-e-wafa mein rawan su-e-dar hai ki nahin

agar ho rizq ka aajir pe inhisar to ye

KHilaf-e-wada-e-parwardigar hai ki nahin

chaman hai jin ke tasarruf mein un se ye puchho

lahu hamara sharik-e-bahaar hai ki nahin

kashakash-e-rah-e-hasti se tu pareshan hai

haqiqaton se ye 'nazmi' farar hai ki nahin