fazaen kaif-e-bahaaran se jab mahakti hain

fazā.eñ kaif-e-bahārāñ se jab mahaktī haiñ

to dil meñ choTeñ tirī yaad kī kasaktī haiñ

shafaq ke rañg bhī un kā javāb lā na sake

kisī ke chehre pe jo surḳhiyāñ damaktī haiñ

jinheñ tumhārā tabassum milā hai vo nazreñ

fazā meñ nuur ke naġhme bikher saktī haiñ

kabhī kabhī to sitāroñ ke narm saa.e meñ

kisī ke jism kī parchhā.iyāñ chamaktī haiñ

qadam qadam pe bichhātī hai jaal tīra-shabī

nafas nafas pe na.ī bijliyāñ chamaktī haiñ

jahāñ vo āñkheñ mirā intizār kartī thiiñ

ab un darīchoñ se māyūsiyāñ Tapaktī haiñ

sukūt-e-shab meñ tire intizār kā aalam

ki jaise duur kahīñ pā.eleñ khanaktī haiñ

unhīñ kā naam kahīñ mastī-e-bahār na ho

kalī ke siine meñ jo nik.hateñ dhaḌaktī haiñ

ho intizār kisī kā magar mirī nazreñ

na jaane kyuuñ tirī aamad kī raah taktī haiñ

jab un ke aane kī ummīd hī nahīñ 'arshad'

to phir nigāheñ ḳhalāoñ meñ kyuuñ bhaTaktī haiñ

fazaen kaif-e-bahaaran se jab mahakti hain

to dil mein choTen teri yaad ki kasakti hain

shafaq ke rang bhi un ka jawab la na sake

kisi ke chehre pe jo surKHiyan damakti hain

jinhen tumhaara tabassum mila hai wo nazren

faza mein nur ke naghme bikher sakti hain

kabhi kabhi to sitaron ke narm sae mein

kisi ke jism ki parchhaiyan chamakti hain

qadam qadam pe bichhati hai jal tira-shabi

nafas nafas pe nai bijliyan chamakti hain

jahan wo aankhen mera intizar karti thin

ab un darichon se mayusiyan Tapakti hain

sukut-e-shab mein tere intizar ka aalam

ki jaise dur kahin paelen khanakti hain

unhin ka nam kahin masti-e-bahaar na ho

kali ke sine mein jo nikhaten dhaDakti hain

ho intizar kisi ka magar meri nazren

na jaane kyun teri aamad ki rah takti hain

jab un ke aane ki ummid hi nahin 'arshad'

to phir nigahen KHalaon mein kyun bhaTakti hain