fikr-e-ijad mein hun khol naya dar koi

fikr-e-ījād meñ huuñ khol nayā dar koī

kunj-e-gul bhej mirī shāḳh-e-hunar par koī

rañg kuchh aur nichoḌeñge lahū se apne

phir tarāsheñge ham ik aur nayā paikar koī

bhej kuchh taaza kumak mere musāfir ke liye

phir utartā hai mire dasht meñ lashkar koī

āstīnoñ meñ havāoñ ne chhupāyā huā hai

ham ne dekhā hai chamaktā huā ḳhanjar koī

kyā huā ab ki safar meñ ye mujhe yaad nahīñ

mujh se royā thā bahut der lipaT kar koī

zaḳhm āñkhoñ se Tapaktā hai lahū kī sūrat

yuuñ chalātā hai mire siine meñ nashtar koī

ḳhud ta.āqub meñ mirī ghaat lagā.e kab se

chhup ke baiThā hai mire jism ke andar koī

ek sāhil kā tamāshā.ī hai bas merā vajūd

merī miTTī meñ hai poshīda samundar koī

apnī fikroñ se lahū karte haiñ lafzoñ meñ kashīd

'shāhid' aise nahīñ hotā hai suḳhnavar koī

fikr-e-ijad mein hun khol naya dar koi

kunj-e-gul bhej meri shaKH-e-hunar par koi

rang kuchh aur nichoDenge lahu se apne

phir tarashenge hum ek aur naya paikar koi

bhej kuchh taza kumak mere musafir ke liye

phir utarta hai mere dasht mein lashkar koi

aastinon mein hawaon ne chhupaya hua hai

hum ne dekha hai chamakta hua KHanjar koi

kya hua ab ki safar mein ye mujhe yaad nahin

mujh se roya tha bahut der lipaT kar koi

zaKHm aankhon se Tapakta hai lahu ki surat

yun chalata hai mere sine mein nashtar koi

KHud taaqub mein meri ghat lagae kab se

chhup ke baiTha hai mere jism ke andar koi

ek sahil ka tamashai hai bas mera wajud

meri miTTi mein hai poshida samundar koi

apni fikron se lahu karte hain lafzon mein kashid

'shahid' aise nahin hota hai suKHnawar koi