fikr ki had se guzarti hi gai

fikr kī had se guzartī hī ga.ī

'ishq dariyā meñ utartī hī ga.ī

rang jaane kaise us ne bhar diye

merī chhab har pal nikhartī hī ga.ī

vaqt huuñ maiñ koī kaise roktā

yā'nī maiñ har pal guzartī hī ga.ī

jab na thī sūrat rihā.ī kī to vo

bāl-o-par apne katartī hī ga.ī

sarsarī kah dī thī us ne baat jo

mere dil meñ vo utartī hī ga.ī

pyaar ne us ko sameTā thā magar

vo simaT kar bhī bikhartī hī ga.ī

ġharq ho kar bhī bahūr-e-'ishq se

jab maiñ ubhrī to ubhartī hī ga.ī

fikr ki had se guzarti hi gai

'ishq dariya mein utarti hi gai

rang jaane kaise us ne bhar diye

meri chhab har pal nikharti hi gai

waqt hun main koi kaise rokta

ya'ni main har pal guzarti hi gai

jab na thi surat rihai ki to wo

baal-o-par apne katarti hi gai

sarsari kah di thi us ne baat jo

mere dil mein wo utarti hi gai

pyar ne us ko sameTa tha magar

wo simaT kar bhi bikharti hi gai

gharq ho kar bhi bahur-e-'ishq se

jab main ubhri to ubharti hi gai