fikr kije to zamin-o-asman ki kijiye

fikr kiije to zamīn-o-āsmāñ kī kījiye

baat apnī hī nahīñ saare jahāñ kī kījiye

tazkira sahrā-nashīnoñ kā bhī rakhiye sāmne

baat jab bhī sakinān-e-gulistāñ kī kījiye

zindagī ko zindagī kī shakl denī ho to phir

baat hamdam imtihāñ dar imtihāñ kī kījiye

dil meñ ghar karnā hai duniyā ke to sab se peshtar

kuchh durustī apne aḳhlāq-o-zabāñ kī kījiye

kuchh to us kī jāñ-fishānī kā use dījiye sila

yaad gaahe gaahe nazm-e-bāġhbāñ kī kījiye

jis zabāñ ne aap ko baḳhshā hai andāz-e-kalām

parvarish apne lahū se us zabāñ kī kījiye

fikr kije to zamin-o-asman ki kijiye

baat apni hi nahin sare jahan ki kijiye

tazkira sahra-nashinon ka bhi rakhiye samne

baat jab bhi sakinan-e-gulistan ki kijiye

zindagi ko zindagi ki shakl deni ho to phir

baat hamdam imtihan dar imtihan ki kijiye

dil mein ghar karna hai duniya ke to sab se peshtar

kuchh durusti apne aKHlaq-o-zaban ki kijiye

kuchh to us ki jaan-fishani ka use dijiye sila

yaad gahe gahe nazm-e-baghban ki kijiye

jis zaban ne aap ko baKHsha hai andaz-e-kalam

parwarish apne lahu se us zaban ki kijiye