fikr ko shahpar junun ko naqsh-e-pa mil jaega

fikr ko shahpar junūñ ko naqsh-e-pā mil jā.egā

'azm-e-mohkam le ke uTTho rāsta mil jā.egā

hādsoñ kā kyā hai ye to zindagī ke saath haiñ

ek se bach kar chaloge dūsrā mil jā.egā

dosh par rakkhe hue sar kī koī qīmat nahīñ

sar uThā kar chal koī qātil-adā mil jā.egā

kaun hai mere sivā āsūda-e-ġham shahr meñ

jis se pūchhoge mire ghar kā patā mil jā.egā

dard kā ehsās bhī us meñ ho ye lāzim nahīñ

dil to har pahlū meñ ik TuuTā huā mil jā.egā

marhale aise bhī ā.eñge kabhī sochā na thā

rahzanoñ se ḳhud amīr-e-qāfila mil jā.egā

chehra chehra dekh legā apne apne ḳhadd-o-ḳhāl

ek din har aadmī ko aa.ina mil jā.egā

muntazir hai chashm-e-sāqī jumbish-e-lab kī 'azīz'

be-talab kyā tujh ko barbād-e-anā mil jā.egā

fikr ko shahpar junun ko naqsh-e-pa mil jaega

'azm-e-mohkam le ke uTTho rasta mil jaega

hadson ka kya hai ye to zindagi ke sath hain

ek se bach kar chaloge dusra mil jaega

dosh par rakkhe hue sar ki koi qimat nahin

sar uTha kar chal koi qatil-ada mil jaega

kaun hai mere siwa aasuda-e-gham shahr mein

jis se puchhoge mere ghar ka pata mil jaega

dard ka ehsas bhi us mein ho ye lazim nahin

dil to har pahlu mein ek TuTa hua mil jaega

marhale aise bhi aaenge kabhi socha na tha

rahzanon se KHud amir-e-qafila mil jaega

chehra chehra dekh lega apne apne KHadd-o-KHal

ek din har aadmi ko aaina mil jaega

muntazir hai chashm-e-saqi jumbish-e-lab ki 'aziz'

be-talab kya tujh ko barbaad-e-ana mil jaega