fitna-za fikr har ek dil se nikal achchha hai

fitna-zā fikr har ik dil se nikāl achchhā hai

aa.e gar husn-e-ḳhayāl us ko sambhāl achchhā hai

mere ehsās-e-ḳhudī par na koī zad aa.e

tū jo de de mujhe be-harf savāl achchhā hai

aap māneñ na burā gar to kahūñ ai nāseh

sāhab-e-qāl se to sāhib-e-hāl achchhā hai

be-ḳhayālī na rahe ḳhām-ḳhayālī se bacho

dil meñ bas jaa.e jo un kā hī ḳhayāl achchhā hai

tere ruḳh par ho masarrat to mirā dil masrūr

tere chehre pe na ho gard-e-malāl achchhā hai

pursish-e-ġham bhī nahīñ niiz mulāqāt nahīñ

aap ko ham se ġharīboñ kā ḳhayāl achchhā hai

koī kahtā hai mubārak ho tujhe daur-e-firāq

maiñ samajhtā huuñ magar roz-e-visāl achchhā hai

mulk-gīrī kī havas meñ ho to fitna ḳhud hī

aur fitna ko miTā.e to qitāl achchhā hai

be-niyāz-e-ġham-e-uqbā jo 'nazar' tujh ko kare

āl-o-aulād vo achchhī na vo maal achchhā hai

fitna-za fikr har ek dil se nikal achchha hai

aae gar husn-e-KHayal us ko sambhaal achchha hai

mere ehsas-e-KHudi par na koi zad aae

tu jo de de mujhe be-harf sawal achchha hai

aap manen na bura gar to kahun ai naseh

sahab-e-qal se to sahib-e-haal achchha hai

be-KHayali na rahe KHam-KHayali se bacho

dil mein bas jae jo un ka hi KHayal achchha hai

tere ruKH par ho masarrat to mera dil masrur

tere chehre pe na ho gard-e-malal achchha hai

pursish-e-gham bhi nahin niz mulaqat nahin

aap ko hum se gharibon ka KHayal achchha hai

koi kahta hai mubarak ho tujhe daur-e-firaq

main samajhta hun magar roz-e-visal achchha hai

mulk-giri ki hawas mein ho to fitna KHud hi

aur fitna ko miTae to qital achchha hai

be-niyaz-e-gham-e-uqba jo 'nazar' tujh ko kare

aal-o-aulad wo achchhi na wo mal achchha hai