fughan-e-ruh koi kis tarah sunae use

fuġhān-e-rūh koī kis tarah sunā.e use

ki zaḳhm zaḳhm badan to nazar na aa.e use

na dekhne kī sazā-vār jis ko aañkh huī

koī piyāsā bhalā haath kyā lagā.e use

surūr lazzat-e-hāsil kā kuchh sivā hogā

chalan atā kā agar ḳhusravāna aa.e use

mire lahū meñ utar ā.eñge na.e mausam

chunī hai dil meñ jo dīvār sī vo Dhaa.e use

khulā na us pe kabhī merī aañkh kā manzar

jamī hai aañkh meñ kaa.ī koī dikhā.e use

vo raushnī kā havāla vo rañg-o-bū kā safīr

marī jamāl-pasandī kahīñ se laa.e use

faroġh-e-husn shaguft-e-gul o ram-e-shabnam

fareb kaise ye 'shāhid' koī sujhā.e use

fughan-e-ruh koi kis tarah sunae use

ki zaKHm zaKHm badan to nazar na aae use

na dekhne ki saza-war jis ko aankh hui

koi piyasa bhala hath kya lagae use

surur lazzat-e-hasil ka kuchh siwa hoga

chalan ata ka agar KHusrawana aae use

mere lahu mein utar aaenge nae mausam

chuni hai dil mein jo diwar si wo Dhae use

khula na us pe kabhi meri aankh ka manzar

jami hai aankh mein kai koi dikhae use

wo raushni ka hawala wo rang-o-bu ka safir

mari jamal-pasandi kahin se lae use

farogh-e-husn shaguft-e-gul o ram-e-shabnam

fareb kaise ye 'shahid' koi sujhae use