fughan ki rahbar-e-rah-e-talab hain KHud kaj-rau

fuġhāñ ki rahbar-e-rāh-e-talab haiñ ḳhud kaj-rau

mile to kaise mile ab surāġh-e-manzil-e-nau

ye rang-o-nūr kā aalam ye mehr-o-māh kī zau

dar-asl hai mire husn-e-ḳhayāl kā partau

jo zindagī thī halāk-e-fusūn-e-rasm-e-kuhan

sañvar rahī hai ba-faiz-e-shu.ūr-e-ādam-e-nau

rah-e-talab meñ kisī rāhzan kā zikr hī kyā

jo rāhbar haiñ guzar un se bach ke ai rahrau

hameñ to manzil-e-maqsūd tak pahuñchnā hai

savād-e-shām kare rahbarī ki sub.h-e-nau

vo baat jis kā haqā.eq se vāsta bhī na thā

ḳhushā ki ban ga.ī unvān har fasāna-e-nau

taras rahā huuñ maiñ takmīl-e-ārzū ke liye

ye āshiqī kā sila hai ki hāsil-e-tag-o-dau

'atīq' maut hai sirf is liye aziiz mujhe

ki zindagī hai bhaḌakte hue charāġh kī lau

fughan ki rahbar-e-rah-e-talab hain KHud kaj-rau

mile to kaise mile ab suragh-e-manzil-e-nau

ye rang-o-nur ka aalam ye mehr-o-mah ki zau

dar-asl hai mere husn-e-KHayal ka partau

jo zindagi thi halak-e-fusun-e-rasm-e-kuhan

sanwar rahi hai ba-faiz-e-shuur-e-adam-e-nau

rah-e-talab mein kisi rahzan ka zikr hi kya

jo rahbar hain guzar un se bach ke ai rahrau

hamein to manzil-e-maqsud tak pahunchna hai

sawad-e-sham kare rahbari ki subh-e-nau

wo baat jis ka haqaeq se wasta bhi na tha

KHusha ki ban gai unwan har fasana-e-nau

taras raha hun main takmil-e-arzu ke liye

ye aashiqi ka sila hai ki hasil-e-tag-o-dau

'atiq' maut hai sirf is liye aziz mujhe

ki zindagi hai bhaDakte hue charagh ki lau