fughan-o-ah se paida kiya dard-e-judai ko

fuġhān-o-āh se paidā kiyā dard-e-judā.ī ko

ġhazab meñ jaan ko Daalā jatā kar āshnā.ī ko

miTāyā pās-e-rusvā.ī se merī āshnā.ī ko

bichhā.ūñ aap kī ismat ko oḌhūñ pārsā.ī ko

na aayā bā'd-e-murdan bhī lahad par fātiha paḌhne

maiñ itnā bhī na samjhā thā tirī nā-āshnā.ī ko

na dil apnā huā apnā na ik but par huā qaabū

kareñge yaad kyā ham ai ḳhudā tere ḳhudā.ī ko

kisī mahfil meñ jis dam zikr-e-sham-e-tūr hotā hai

dikhā dete haiñ vo jal kar sar-añgusht-e-hinā.ī ko

faqīr-e-be-navā us ke dar-e-daulat kā hai banda

ġhanīmat jānte haiñ shaah tak jis kī gadā.ī ko

asar paidā karegī aah apnī yaar ke dil meñ

nishāne tak ḳhudā pahuñchā.egā tīr-e-havā.ī ko

kabhī hai fikr duniyā kī kabhī uqbā kā dhaḌkā hai

utārūñ jāma-e-tan se maiñ kyūñkar is dulā.ī ko

garebāñ haath aatā hai na sahrā tak pahuñchtā huuñ

ḳhudā ke vāste dekho mire be-dast-o-pā.ī ko

falak vo tafraqa-parvāz-e-ālam hai dilā sar par

ġhanīmat jāntā huuñ gor tak apnī rasā.ī ko

shikasta-dil haiñ har dam har ghaḌī haiñ jaan ke laale

karūñ kyā nosh-dārū ko maiñ kyā luuñ mūsiyā.ī ko

tamannā-e-dilī ne 'muntahī' khoyā mashīḳhat ko

milāyā ḳhaak meñ dast-e-havas ne mīrzā.ī ko

fughan-o-ah se paida kiya dard-e-judai ko

ghazab mein jaan ko Dala jata kar aashnai ko

miTaya pas-e-ruswai se meri aashnai ko

bichhaun aap ki ismat ko oDhun parsai ko

na aaya ba'd-e-murdan bhi lahad par fatiha paDhne

main itna bhi na samjha tha teri na-ashnai ko

na dil apna hua apna na ek but par hua qabu

karenge yaad kya hum ai KHuda tere KHudai ko

kisi mahfil mein jis dam zikr-e-sham-e-tur hota hai

dikha dete hain wo jal kar sar-angusht-e-hinai ko

faqir-e-be-nawa us ke dar-e-daulat ka hai banda

ghanimat jaante hain shah tak jis ki gadai ko

asar paida karegi aah apni yar ke dil mein

nishane tak KHuda pahunchaega tir-e-hawai ko

kabhi hai fikr duniya ki kabhi uqba ka dhaDka hai

utarun jama-e-tan se main kyunkar is dulai ko

gareban hath aata hai na sahra tak pahunchta hun

KHuda ke waste dekho mere be-dast-o-pai ko

falak wo tafraqa-parwaz-e-alam hai dila sar par

ghanimat jaanta hun gor tak apni rasai ko

shikasta-dil hain har dam har ghaDi hain jaan ke lale

karun kya nosh-daru ko main kya lun musiyai ko

tamanna-e-dili ne 'muntahi' khoya mashiKHat ko

milaya KHak mein dast-e-hawas ne mirzai ko