furqat ki aafat bure din kaTna sal hai

furqat kī aafat bure din kāTnā saal hai

ye haath hai so kare ye siina ghaḌiyāl hai

rotā huuñ shām-o-sahar TukḌe hai ġham se jigar

bedard kuchh rahm kar merā burā haal hai

bechain kahāñ dil-e-sāmāñ yāqūb kā hai maqāl

jins-e-vafā kā hai kaal kan.ān meñ haT-tāl hai

resham ke lachchhe haiñ baal maḳhmal ke TukḌe haiñ gaal

hai ye nazākat kā haal patlī kamar baal hai

āshiq bache tā-ba kī kaalī balā hai ye shai

kākul kā jo halqa hai muuzī kā chañgāl hai

kyuuñ aa.e ham ai parī halchal meñ hai zindagī

aafat hai tere gale āñdhī hai bhauñchāl hai

phūloñ meñ rañgat na bū sabze ko kuuḌā kaho

pā-e-ḳhizāñ qat.a ho gulzār pā.emāl hai

dil nazar jis ne kiyā Thukrā ke us ne kahā

letī hai merī balā dargor kyā maal hai

har-dam na dekh us ke baal sar par na le ye vabāl

jī ko balā meñ na Daal ai dil ye janjāl hai

raftār kahiye use dil har qadam par pise

pūchhe koī kabk se sadqe ajab chaal hai

kyā kahiye kyā ġham sahā din-rāt rotā rahā

dil ḳhuun ho kar bahā rañgīn rūmāl hai

ushshāq kā hai ye haal din-rāt hai hāl-e-qāl

āh-o-fuġhāñ hai ḳhayāl-e-sīna-zanī taal hai

saut jafā-kesh hai āshiq jigar-resh hai

abrū hai yā niish hai bichchhū hai yā ḳhaal hai

hai kuchh na kuchh to ba-jog nāhaq nahīñ hai ye birog

kaisā lagā jī ko rog ai 'bahr' kyā haal hai

furqat ki aafat bure din kaTna sal hai

ye hath hai so kare ye sina ghaDiyal hai

rota hun sham-o-sahar TukDe hai gham se jigar

bedard kuchh rahm kar mera bura haal hai

bechain kahan dil-e-saman yaqub ka hai maqal

jins-e-wafa ka hai kal kanan mein haT-tal hai

resham ke lachchhe hain baal maKHmal ke TukDe hain gal

hai ye nazakat ka haal patli kamar baal hai

aashiq bache ta-ba ki kali bala hai ye shai

kakul ka jo halqa hai muzi ka changal hai

kyun aae hum ai pari halchal mein hai zindagi

aafat hai tere gale aandhi hai bhaunchaal hai

phulon mein rangat na bu sabze ko kuDa kaho

pa-e-KHizan qata ho gulzar paemal hai

dil nazar jis ne kiya Thukra ke us ne kaha

leti hai meri bala dargor kya mal hai

har-dam na dekh us ke baal sar par na le ye wabaal

ji ko bala mein na Dal ai dil ye janjal hai

raftar kahiye use dil har qadam par pise

puchhe koi kabk se sadqe ajab chaal hai

kya kahiye kya gham saha din-raat rota raha

dil KHun ho kar baha rangin rumal hai

ushshaq ka hai ye haal din-raat hai haal-e-qal

aah-o-fughan hai KHayal-e-sina-zani tal hai

saut jafa-kesh hai aashiq jigar-resh hai

abru hai ya nish hai bichchhu hai ya KHal hai

hai kuchh na kuchh to ba-jog nahaq nahin hai ye birog

kaisa laga ji ko rog ai 'bahr' kya haal hai