gae dinon ke dariche sajaane lagte hain

ga.e dinoñ ke darīche sajāne lagte haiñ

ham apne haal ko maazī banāne lagte haiñ

ḳhulūs-o-mehr-o-mohabbat kī qadr ḳhatm huī

hayāt-e-nau meñ ye sikke purāne lagte haiñ

vo kaun hai jo unheñ khelne nahīñ detā

vo kam-sinī meñ jo rozī kamāne lagte haiñ

maiñ terī zulf ke saa.e meñ ruk to jā.ūñ magar

tire jamāl ke sho.ale jalāne lagte haiñ

zamāne ba.ad tū aayā hai lamha bhar to Thahar

ki āte-āte ye lamha zamāne lagte haiñ

jinhoñ ne qaumī tashaḳhḳhus ko pā.emāl kiyā

ma.āshre ko vo ūñche gharāne lagte haiñ

hameñ vo ġhair samajhtā hai to gila kaisā

ki ibtidā meñ ġhalat bhī nishāne lagte haiñ

ye ishq-bel kabhī sūkhtī nahīñ 'nusrat'

visāl-rut meñ isī ko fasāne lagte haiñ

gae dinon ke dariche sajaane lagte hain

hum apne haal ko mazi banane lagte hain

KHulus-o-mehr-o-mohabbat ki qadr KHatm hui

hayat-e-nau mein ye sikke purane lagte hain

wo kaun hai jo unhen khelne nahin deta

wo kam-sini mein jo rozi kamane lagte hain

main teri zulf ke sae mein ruk to jaun magar

tere jamal ke shoale jalane lagte hain

zamane baad tu aaya hai lamha bhar to Thahar

ki aate-ate ye lamha zamane lagte hain

jinhon ne qaumi tashaKHKHus ko paemal kiya

maashre ko wo unche gharane lagte hain

hamein wo ghair samajhta hai to gila kaisa

ki ibtida mein ghalat bhi nishane lagte hain

ye ishq-bel kabhi sukhti nahin 'nusrat'

visal-rut mein isi ko fasane lagte hain