gagan mein jab apna sitara na dekha

gagan meñ jab apnā sitāra na dekhā

to jiine kā koī sahārā na dekhā

nazar hai, magar vo nazar kyā ki jis ne

ḳhud apnī nazar kā nazāra na dekhā

bhale vo Dubā.e ubhāre ki ham ne

bhañvar dekh lī to kināra na dekhā

vo bas naam kā aa.ina hai ki jis ne

kabhī husn ko ḳhud sañvārā na dekhā

tumheñ jab se dekhā, tumheñ dekhte haiñ

kabhī muḌ ke ḳhud ko dobāra na dekhā

sabhī nafratoñ kī davā hai mohabbat

ki is se alag koī chārā na dekhā

maiñ bādal meñ royā, hañsā bijliyoñ meñ

kisī ne ye merā ishāra na dekhā

'kuñvar' ham usī ke hue jā rahe haiñ

jise ham ne ab tak pukārā na dekhā

gagan mein jab apna sitara na dekha

to jine ka koi sahaara na dekha

nazar hai, magar wo nazar kya ki jis ne

KHud apni nazar ka nazara na dekha

bhale wo Dubae ubhaare ki hum ne

bhanwar dekh li to kinara na dekha

wo bas nam ka aaina hai ki jis ne

kabhi husn ko KHud sanwara na dekha

tumhein jab se dekha, tumhein dekhte hain

kabhi muD ke KHud ko dobara na dekha

sabhi nafraton ki dawa hai mohabbat

ki is se alag koi chaara na dekha

main baadal mein roya, hansa bijliyon mein

kisi ne ye mera ishaara na dekha

'kunwar' hum usi ke hue ja rahe hain

jise hum ne ab tak pukara na dekha