gahe makan se suni gah-e-la-makan se suni

gahe makāñ se sunī gāh-e-lā-makāñ se sunī

shikast-e-dil kī sadā kyā kahūñ kahāñ se sunī

na bū-e-gul ne kahā kuchh na to sabā ne kahā

hadīs-e-barq-o-sharar ham ne āshiyāñ se sunī

tamām hāsil-e-ayyām jis safar meñ luTā

vo dāstan-e-safar umr-e-rā.egāñ se sunī

zamāna manzil-e-gum-gashta kī talāsh meñ hai

ye baat uḌtī huī gard-e-kārvāñ se sunī

hai zindagī se jo taḳhlīq-e-fan kā rishta 'nāz'

tamām umr ye āvāz sāz-e-jāñ se sunī

gahe makan se suni gah-e-la-makan se suni

shikast-e-dil ki sada kya kahun kahan se suni

na bu-e-gul ne kaha kuchh na to saba ne kaha

hadis-e-barq-o-sharar hum ne aashiyan se suni

tamam hasil-e-ayyam jis safar mein luTa

wo dastan-e-safar umr-e-raegan se suni

zamana manzil-e-gum-gashta ki talash mein hai

ye baat uDti hui gard-e-karwan se suni

hai zindagi se jo taKHliq-e-fan ka rishta 'naz'

tamam umr ye aawaz saz-e-jaan se suni