ghair-abaad ilaqe ki faza kaisi hai

ġhair-ābād ilāqe kī fazā kaisī hai

dil se uThtī hai jo rah rah ke sadā kaisī hai

mere pairoñ se lipaTtī hī rahī mauj-e-ravāñ

ret se kar na sakī mujh ko judā kaisī hai

TuuT kar aa.ī hai lahrā.ī hai chāroñ jānib

ye barastī hī nahīñ kaalī ghaTā kaisī hai

pattiyāñ dhuup meñ kumhlā ga.iiñ phīke hue rañg

chhāñv utrī hī nahīñ āb-o-havā kaisī hai

baasī phūloñ ko na jhulsā.e to sūraj kaisā

taaza kaliyāñ na khilā.e to sabā kaisī hai

kyuuñ nahīñ girte saroñ pe ye havā ke neze

ġharq kartī hī nahīñ mauj-e-fanā kaisī hai

zard alfāz kā zahrīlā bhayānak aaseb

mere ghar chhoḌ ga.ī merī sadā kaisī hai

shahr-e-afsūñ mujhe āvāz de patthar kar de

maiñ ise dekh to luuñ merī ḳhatā kaisī hai

ghair-abaad ilaqe ki faza kaisi hai

dil se uThti hai jo rah rah ke sada kaisi hai

mere pairon se lipaTti hi rahi mauj-e-rawan

ret se kar na saki mujh ko juda kaisi hai

TuT kar aai hai lahrai hai chaaron jaanib

ye barasti hi nahin kali ghaTa kaisi hai

pattiyan dhup mein kumhla gain phike hue rang

chhanw utri hi nahin aab-o-hawa kaisi hai

basi phulon ko na jhulsae to suraj kaisa

taza kaliyan na khilae to saba kaisi hai

kyun nahin girte saron pe ye hawa ke neze

gharq karti hi nahin mauj-e-fana kaisi hai

zard alfaz ka zahrila bhayanak aaseb

mere ghar chhoD gai meri sada kaisi hai

shahr-e-afsun mujhe aawaz de patthar kar de

main ise dekh to lun meri KHata kaisi hai