ghalat the wade magar main yaqin rakhta tha

ġhalat the va.ade magar maiñ yaqīn rakhtā thā

vo shaḳhs lahja baḌā dil-nashīn rakhtā thā

hai taar taar mire e'timād kā dāman

kise batā.ūñ ki maiñ bhī amiin rakhtā thā

utar gayā hai ragoñ meñ mire lahū ban kar

vo zahr zā.iqa-e-angbīn rakhtā thā

guzarne vaale na yuuñ sarsarī guzar dil se

makāñ shikasta sahī par makīn rakhtā thā

vo jauharī na rahā ab use kahāñ DhūñDeñ

jo lafz lafz meñ durr-e-samīn rakhtā thā

vo aql-e-kul thā bhalā kis kī māntā 'mohsin'

ḳhayāl-e-ḳhām pe puḳhta yaqīn rakhtā thā

ghalat the wade magar main yaqin rakhta tha

wo shaKHs lahja baDa dil-nashin rakhta tha

hai tar tar mere e'timad ka daman

kise bataun ki main bhi amin rakhta tha

utar gaya hai ragon mein mere lahu ban kar

wo zahr zaiqa-e-angbin rakhta tha

guzarne wale na yun sarsari guzar dil se

makan shikasta sahi par makin rakhta tha

wo jauhari na raha ab use kahan DhunDen

jo lafz lafz mein durr-e-samin rakhta tha

wo aql-e-kul tha bhala kis ki manta 'mohsin'

KHayal-e-KHam pe puKHta yaqin rakhta tha