gali gali hai andhera to mere sath chalo

galī galī hai añdherā to mere saath chalo

tumheñ ḳhayāl hai merā to mere saath chalo

maiñ jā rahā huuñ ujāloñ kī justujū ke liye

satā rahā ho añdherā to mere saath chalo

junūñ ke dasht meñ ik chhāvnī basā leñge

nahīñ hai koī baserā to mere saath chalo

maiñ rāhzan huuñ magar āshnā-e-manzil-e-dil

jo rāhbar hai luTerā to mere saath chalo

qadam qadam pe jalātā chalūñgā dil ke charāġh

jo rāsta hai añdherā to mere saath chalo

agar chaman se ziyāda pasand hai tum ko

ġharīb-e-dasht kā Derā to mere saath chalo

'shamīm' zulmat-e-daurāñ se jañg hai darpesh

jo chāhtā ho saverā to mere saath chalo

gali gali hai andhera to mere sath chalo

tumhein KHayal hai mera to mere sath chalo

main ja raha hun ujalon ki justuju ke liye

sata raha ho andhera to mere sath chalo

junun ke dasht mein ek chhawni basa lenge

nahin hai koi basera to mere sath chalo

main rahzan hun magar aashna-e-manzil-e-dil

jo rahbar hai luTera to mere sath chalo

qadam qadam pe jalata chalunga dil ke charagh

jo rasta hai andhera to mere sath chalo

agar chaman se ziyaada pasand hai tum ko

gharib-e-dasht ka Dera to mere sath chalo

'shamim' zulmat-e-dauran se jang hai darpesh

jo chahta ho sawera to mere sath chalo