gham-ba-dil shukr-ba-lab mast o ghazal-KHwan chaliye

ġham-ba-dil shukr-ba-lab mast o ġhazal-ḳhvāñ chaliye

jab tilak saath tire umr-e-gurezāñ chaliye

rahmat-e-haq se jo is samt kabhī raah mile

sū-e-jannat bhī ba-rāh-e-rah-e-jānāñ chaliye

nazr māñge jo gulistāñ se ḳhudā-vand-e-jahāñ

sāġhar-e-mai meñ liye ḳhūn-e-bahārāñ chaliye

jab satāne lage be-rañgi-e-dīvār-e-jahāñ

naqsh karne koī tasvīr-e-hasīnāñ chaliye

kuchh bhī ho ā.īna-e-dil ko musaffā rakhiye

jo bhī guzre masal-e-ḳhusrav-e-daurāñ chaliye

imtihāñ jab bhī ho manzūr jigar-dāroñ kā

mahfil-e-yār meñ ham-rāh-e-raqībāñ chaliye

gham-ba-dil shukr-ba-lab mast o ghazal-KHwan chaliye

jab tilak sath tere umr-e-gurezan chaliye

rahmat-e-haq se jo is samt kabhi rah mile

su-e-jannat bhi ba-rah-e-rah-e-jaanan chaliye

nazr mange jo gulistan se KHuda-wand-e-jahan

saghar-e-mai mein liye KHun-e-bahaaran chaliye

jab satane lage be-rangi-e-diwar-e-jahan

naqsh karne koi taswir-e-hasinan chaliye

kuchh bhi ho aaina-e-dil ko musaffa rakhiye

jo bhi guzre masal-e-KHusraw-e-dauran chaliye

imtihan jab bhi ho manzur jigar-daron ka

mahfil-e-yar mein ham-rah-e-raqiban chaliye