gham bhi mera ajib hai meri KHushi ajib

ġham bhī mirā ajiib hai merī ḳhushī ajiib

baḳhshī hai rabb-e-haq ne mujhe zindagī ajiib

phūloñ kā jism jhulse hai kāñToñ pe tāzgī

is āftāb-e-asr kī hai raushnī ajiib

rahte haiñ saath saath magar be-tavajjoh se

lagtī hai mujh ko aap kī pahlū-tahī ajiib

majbūr-e-ishq huuñ maiñ nahīñ to ai mere dil

kal un se guftugū to huī vāqa.ī ajiib

vo kaun husn-e-nāz hai jis ke vasīle se

tārīkiyoñ meñ phail ga.ī chāñdnī ajiib

haiñ maslahat ke daur kī nairañgiyāñ tamām

hai chārāgar ajiib na chāragarī ajiib

dushman bhī dushmanī se gurezāñ huā hai aaj

'shāriq' tumhāre dost kī hai dostī ajiib

gham bhi mera ajib hai meri KHushi ajib

baKHshi hai rabb-e-haq ne mujhe zindagi ajib

phulon ka jism jhulse hai kanTon pe tazgi

is aaftab-e-asr ki hai raushni ajib

rahte hain sath sath magar be-tawajjoh se

lagti hai mujh ko aap ki pahlu-tahi ajib

majbur-e-ishq hun main nahin to ai mere dil

kal un se guftugu to hui waqai ajib

wo kaun husn-e-naz hai jis ke wasile se

tarikiyon mein phail gai chandni ajib

hain maslahat ke daur ki nairangiyan tamam

hai chaaragar ajib na chaaragari ajib

dushman bhi dushmani se gurezan hua hai aaj

'shaariq' tumhaare dost ki hai dosti ajib