gham-e-duniya ko bas meri taraf aane ki jaldi hai

ġham-e-duniyā ko bas merī taraf aane kī jaldī hai

har achchhe vaqt ko mujh se bichhaḌ jaane kī jaldī hai

baḌā nuqsān kar baiThī maiñ apnā jald-bāzī meñ

usī ko kho diyā maiñ ne jise paane kī jaldī hai

tum itnā muḳhtasar sā vaqt le kar aa.e hī kyoñ the

idhar aane meñ derī kī udhar jaane kī jaldī thī

haTā kar raah ke kāñTe nikal aa.ī salīqe se

mujhe jab manzil-e-maqsūd ko paane kī jaldī thī

'siyā' sab kah rahe haiñ zindagī kī aur ab dekho

magar dil kī tamannāoñ ko mar jaane kī jaldī hai

gham-e-duniya ko bas meri taraf aane ki jaldi hai

har achchhe waqt ko mujh se bichhaD jaane ki jaldi hai

baDa nuqsan kar baiThi main apna jald-bazi mein

usi ko kho diya main ne jise pane ki jaldi hai

tum itna muKHtasar sa waqt le kar aae hi kyon the

idhar aane mein deri ki udhar jaane ki jaldi thi

haTa kar rah ke kanTe nikal aai saliqe se

mujhe jab manzil-e-maqsud ko pane ki jaldi thi

'siya' sab kah rahe hain zindagi ki aur ab dekho

magar dil ki tamannaon ko mar jaane ki jaldi hai