gham-e-furqat hi mein marna ho to dushwar nahin

ġham-e-furqat hī meñ marnā ho to dushvār nahīñ

shādi-e-vasl bhī āshiq ko sazā-vār nahīñ

ḳhūb-rūī ke liye zishtī-e-ḳhū bhī hai zarūr

sach to ye hai ki koī tujh sā tarah-dār nahīñ

qaul dene meñ ta.ammul na qasam se inkār

ham ko sachchā nazar aatā koī iqrār nahīñ

kal ḳharābāt meñ ik goshe se aatī thī sadā

dil meñ sab kuchh hai magar ruḳhsat-e-guftār nahīñ

haq huā kis se adā us kī vafādārī kā

jis ke nazdīk jafā bā.is-e-āzār nahīñ

dekhte haiñ ki pahuñchtī hai vahāñ kaun sī raah

ka.aba o dair se kuchh ham ko sarokār nahīñ

hoñge qaa.il vo abhī matla-e-sānī sun kar

jo tajallī meñ ye kahte haiñ ki takrār nahīñ

gham-e-furqat hi mein marna ho to dushwar nahin

shadi-e-wasl bhi aashiq ko saza-war nahin

KHub-rui ke liye zishti-e-KHu bhi hai zarur

sach to ye hai ki koi tujh sa tarah-dar nahin

qaul dene mein tammul na qasam se inkar

hum ko sachcha nazar aata koi iqrar nahin

kal KHarabaat mein ek goshe se aati thi sada

dil mein sab kuchh hai magar ruKHsat-e-guftar nahin

haq hua kis se ada us ki wafadari ka

jis ke nazdik jafa bais-e-azar nahin

dekhte hain ki pahunchti hai wahan kaun si rah

kaba o dair se kuchh hum ko sarokar nahin

honge qail wo abhi matla-e-sani sun kar

jo tajalli mein ye kahte hain ki takrar nahin