gham-e-hayat ki ye dilkashi ghanimat hai

ġham-e-hayāt kī ye dilkashī ġhanīmat hai

mere qarīb na aa.ī ḳhushī ġhanīmat hai

vo zindagī jo terī yaad kī asiir rahī

kisī tarah se guzar hī ga.ī ġhanīmat hai

hayāt ma.arka-e-ġham se kam nahīñ ai dost

ye chand lamhoñ kī fursat baḌī ġhanīmat hai

ḳhudā kā shukr hai tauhīn-e-iltijā na huī

kisī ne baat mirī maan lī ġhanīmat hai

ta.alluqāt bahar-hāl barqarār to haiñ

jafā-shi.ār kī ye dushmanī ġhanīmat hai

dhaḌakte dil ko kahāñ tak sañbhāl sakte the

hujūm-e-ġham meñ sahar ho ga.ī ġhanīmat hai

koī anīs-e-ġham-e-dil nahīñ rahā ai 'tāj'

merī rafīq mirī shā.irī ġhanīmat hai

gham-e-hayat ki ye dilkashi ghanimat hai

mere qarib na aai KHushi ghanimat hai

wo zindagi jo teri yaad ki asir rahi

kisi tarah se guzar hi gai ghanimat hai

hayat marka-e-gham se kam nahin ai dost

ye chand lamhon ki fursat baDi ghanimat hai

KHuda ka shukr hai tauhin-e-iltija na hui

kisi ne baat meri man li ghanimat hai

talluqat bahar-haal barqarar to hain

jafa-shiar ki ye dushmani ghanimat hai

dhaDakte dil ko kahan tak sanbhaal sakte the

hujum-e-gham mein sahar ho gai ghanimat hai

koi anis-e-gham-e-dil nahin raha ai 'taj'

meri rafiq meri shairi ghanimat hai