ġham-e-hayāt se fursat hameñ kabhī na milī
ḳhushī ke naam ko sunte rahe ḳhushī na milī
usī ke dil se koī us kī tishnagī pūchhe
ki mai-kade meñ jise ek buuñd bhī na milī
maiñ jis taraf bhī jahāñ meñ gayā ḳhushī ke liye
mujhe to ġham ke alāva kahīñ ḳhushī na milī
kabhī kabhī ye jalāne ke baad dekhā hai
mire charāġh se ḳhud mujh ko raushnī na milī
jo un ke sāmne be-iḳhtiyār aa.ī thī
phir aaj tak mire hoñToñ ko vo hañsī na milī
lagā liyā ġham-e-daurāñ ne phir kaleje se
ġham-e-hayāt ke māroñ ko jab ḳhushī na milī
mirā mizāj zamāne ne laakh apnāyā
mire mizāj kī aisī to sādgī na milī
vo aur haiñ ki jo lutf-e-hayāt uThāte haiñ
'kamāl' maut bhī mujh ko hañsī ḳhushī na milī
gham-e-hayat se fursat hamein kabhi na mili
KHushi ke nam ko sunte rahe KHushi na mili
usi ke dil se koi us ki tishnagi puchhe
ki mai-kade mein jise ek bund bhi na mili
main jis taraf bhi jahan mein gaya KHushi ke liye
mujhe to gham ke alawa kahin KHushi na mili
kabhi kabhi ye jalane ke baad dekha hai
mere charagh se KHud mujh ko raushni na mili
jo un ke samne be-iKHtiyar aai thi
phir aaj tak mere honTon ko wo hansi na mili
laga liya gham-e-dauran ne phir kaleje se
gham-e-hayat ke maron ko jab KHushi na mili
mera mizaj zamane ne lakh apnaya
mere mizaj ki aisi to sadgi na mili
wo aur hain ki jo lutf-e-hayat uThate hain
'kamal' maut bhi mujh ko hansi KHushi na mili
Source:
Lahja-e-Ghazal (Pg. 139)
-
Author:
Kamal Lakhnavi
-
- Publisher: Kamal Lakhnavi
- Year of Publication: 1986
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.