gham-e-jahan ke shikaro tumhaare sath hun main

ġham-e-jahāñ ke shikāro tumhāre saath huuñ maiñ

fareb-e-vaqt ke maaro tumhāre saath huuñ maiñ

ḳhirad kī bhūl-bhulayyāñ hazār bhaTkā.eñ

junūñ kī rāh-guzāro tumhāre saath huuñ maiñ

kabhī to aao mire saath tum bhī tūfāñ meñ

shikast-ḳhurda kināro tumhāre saath huuñ maiñ

rah-e-hayāt meñ tum ne diyā na saath to kyā

siyāh-baḳht sitāro tumhāre saath huuñ maiñ

siyāhiyoñ se hī niklegī sub.h-e-nau ai nujūm

ye raat aur guzāro tumhāre saath huuñ maiñ

jihād-e-zīst meñ tanhā nahīñ ho tum yaaro

jahāñ-jahāñ ho pukāro tumhāre saath huuñ maiñ

shikast-e-dil hai tajassus kī maut ham-safaro

kabhī na hausla haaro tumhāre saath huuñ maiñ

mirī hayāt-e-pareshāñ kā koī ġham na karo

tum apnī zulf sañvāro tumhāre saath huuñ maiñ

kashāñ-kashāñ na chalo kahkashāñ kī tarh chalo

mirī zamīñ ke sitāro tumhāre saath huuñ maiñ

kisī kā zaḳhm sahī zaḳhm-e-nasl-e-ādam hai

kahāñ ho sīna-figāro tumhāre saath huuñ maiñ

rutoñ ke saath badalte nahīñ bashar 'kāmil'

ḳhizāñ-nasīb bahāro tumhāre saath huuñ maiñ

gham-e-jahan ke shikaro tumhaare sath hun main

fareb-e-waqt ke maro tumhaare sath hun main

KHirad ki bhul-bhulayyan hazar bhaTkaen

junun ki rah-guzaro tumhaare sath hun main

kabhi to aao mere sath tum bhi tufan mein

shikast-KHurda kinaro tumhaare sath hun main

rah-e-hayat mein tum ne diya na sath to kya

siyah-baKHt sitaro tumhaare sath hun main

siyahiyon se hi niklegi subh-e-nau ai nujum

ye raat aur guzaro tumhaare sath hun main

jihad-e-zist mein tanha nahin ho tum yaro

jahan-jahan ho pukaro tumhaare sath hun main

shikast-e-dil hai tajassus ki maut ham-safaro

kabhi na hausla haaro tumhaare sath hun main

meri hayat-e-pareshan ka koi gham na karo

tum apni zulf sanwaro tumhaare sath hun main

kashan-kashan na chalo kahkashan ki tarh chalo

meri zamin ke sitaro tumhaare sath hun main

kisi ka zaKHm sahi zaKHm-e-nasl-e-adam hai

kahan ho sina-figaro tumhaare sath hun main

ruton ke sath badalte nahin bashar 'kaamil'

KHizan-nasib bahaaro tumhaare sath hun main