gham-e-ulfat ne lutf-e-zindagi ki aabru rakh li

ġham-e-ulfat ne lutf-e-zindagī kī aabrū rakh lī

ye vo dushman hai jis ne dostī kī aabrū rakh lī

siyah zulfoñ ne lahrā kar nikhārā husn chehre kā

añdheroñ ne bikhar kar raushnī kī aabrū rakh lī

hañsī aa to rahī hai dil ke zaḳhmoñ ko ye kyā kam hai

tire baḳhshe hue ġham ne ḳhushī kī aabrū rakh lī

nigāh-e-nāz ke andāz to dekho ki chupke se

kisī kī aabrū le lī kisī kī aabrū rakh lī

ye merā zarf hai jo maiñ ne kaḌve ghūñT pī kar bhī

sar-e-mahfil tirī sāqī-garī kī aabrū rakh lī

na aatī rañg par ye bazm-e-hastī vo to ye kaise

ki sāz-e-dil ne naġhma-parvarī kī aabrū rakh lī

gham-e-ulfat ne lutf-e-zindagi ki aabru rakh li

ye wo dushman hai jis ne dosti ki aabru rakh li

siyah zulfon ne lahra kar nikhaara husn chehre ka

andheron ne bikhar kar raushni ki aabru rakh li

hansi aa to rahi hai dil ke zaKHmon ko ye kya kam hai

tere baKHshe hue gham ne KHushi ki aabru rakh li

nigah-e-naz ke andaz to dekho ki chupke se

kisi ki aabru le li kisi ki aabru rakh li

ye mera zarf hai jo main ne kaDwe ghunT pi kar bhi

sar-e-mahfil teri saqi-gari ki aabru rakh li

na aati rang par ye bazm-e-hasti wo to ye kaise

ki saz-e-dil ne naghma-parwari ki aabru rakh li