gham gardish-e-dauran ke bhulae nahin jate

ġham gardish-e-daurāñ ke bhulā.e nahīñ jaate

ab zaḳhm dil-o-jāñ ke chhupā.e nahīñ jaate

kyā ruuh kī gahrā.ī meñ tum jhāñk rahe ho

ab raaz mohabbat ke chhupā.e nahīñ jaate

jin rāh-guzāroñ pe tire naqsh-e-qadam haiñ

vo naqsh-e-qadam ham se miTā.e nahīñ jaate

zulmat ke manāzir se rihā ho ga.iiñ nazreñ

zehnoñ se magar ḳhauf ke saa.e nahīñ jaate

maiñ kaise tilāvat karūñ āyāt vafā kī

kyoñ tāj-mahal aaj banā.e nahīñ jaate

'gulnār' har ik sher se zāhir hai tirā ġham

ash.ār kabhī yūñhī sunā.e nahīñ jaate

gham gardish-e-dauran ke bhulae nahin jate

ab zaKHm dil-o-jaan ke chhupae nahin jate

kya ruh ki gahrai mein tum jhank rahe ho

ab raaz mohabbat ke chhupae nahin jate

jin rah-guzaron pe tere naqsh-e-qadam hain

wo naqsh-e-qadam hum se miTae nahin jate

zulmat ke manazir se riha ho gain nazren

zehnon se magar KHauf ke sae nahin jate

main kaise tilawat karun aayat wafa ki

kyon taj-mahal aaj banae nahin jate

'gulnar' har ek sher se zahir hai tera gham

ashaar kabhi yunhi sunae nahin jate