gham hi le de ke meri daulat-e-bedar nahin

ġham hī le de ke mirī daulat-e-bedār nahīñ

ye ḳhushī bhī hai mayassar koī ġham-ḳhvār nahīñ

ḳhud se bhī toḌ chukā huuñ maiñ ta.alluq apnā

ab mirī raah meñ haa.il koī dīvār nahīñ

aisī sunsān kabhī pahle na thī hijr kī raat

duur tak qāfila-e-sub.h ke āsār nahīñ

baat āsān farāvāni-e-ġham ne kar dī

ab mujhe shikva-e-nā-kāmi-e-iz.hār nahīñ

zinda rah luuñ kisī sūrat to baḌī baat hai ye

varna jaañ se to guzarnā koī dushvār nahīñ

dām-e-vahshat se rihā.ī nahīñ mumkin shāyad

huuñ asiir apnā bhī sirf us kā giraftār nahīñ

qissa-e-ġham bhī vahī maiñ bhī vahī dil bhī vahī

par vo pahlā sā ḳhulūs-e-dar-o-dīvār nahīñ

gham hi le de ke meri daulat-e-bedar nahin

ye KHushi bhi hai mayassar koi gham-KHwar nahin

KHud se bhi toD chuka hun main talluq apna

ab meri rah mein hail koi diwar nahin

aisi sunsan kabhi pahle na thi hijr ki raat

dur tak qafila-e-subh ke aasar nahin

baat aasan farawani-e-gham ne kar di

ab mujhe shikwa-e-na-kaami-e-izhaar nahin

zinda rah lun kisi surat to baDi baat hai ye

warna jaan se to guzarna koi dushwar nahin

dam-e-wahshat se rihai nahin mumkin shayad

hun asir apna bhi sirf us ka giraftar nahin

qissa-e-gham bhi wahi main bhi wahi dil bhi wahi

par wo pahla sa KHulus-e-dar-o-diwar nahin