gham ke be-nur mazaron ka gala ghonT aaya

ġham ke be-nūr mazāroñ kā galā ghoñT aayā

saare be-mehr sahāroñ kā galā ghoñT aayā

qarya-e-hijr ke ik ghar kā vo vīrān āñgan

vasl ke shoḳh nazāroñ kā galā ghoñT aayā

raah ke sañg ko suulī pe chaḌhāyā pahle

aur phir paañv ke ḳhāroñ kā galā ghoñT aayā

roz sūraj ki taraf se ye savāl aatā hai

kyā maiñ un chand sitāroñ kā galā ghoñT aayā

zulmat-e-shab maiñ vo bastī ke nashīnoñ kā junūn

shahr kī saare manāroñ kā galā ghoñT aayā

haa.e ik phuul masalne ko ye kāñToñ kā hujūm

jā ke gulshan meñ bahāroñ kā galā ghoñT aayā

Dār-e-purkhār pe laTkā ke sulagte phande

qatra-e-āb sharāroñ kā galā ghoñT aayā

aaj phir zabt-e-rag-e-jāñ se nikal kar 'nāyāb'

dard ke jalte dayāroñ kā galā ghoñT aayā

gham ke be-nur mazaron ka gala ghonT aaya

sare be-mehr sahaaron ka gala ghonT aaya

qarya-e-hijr ke ek ghar ka wo viran aangan

wasl ke shoKH nazaron ka gala ghonT aaya

rah ke sang ko suli pe chaDhaya pahle

aur phir panw ke KHaron ka gala ghonT aaya

roz suraj ki taraf se ye sawal aata hai

kya main un chand sitaron ka gala ghonT aaya

zulmat-e-shab main wo basti ke nashinon ka junun

shahr ki sare manaron ka gala ghonT aaya

hae ek phul masalne ko ye kanTon ka hujum

ja ke gulshan mein bahaaron ka gala ghonT aaya

Dar-e-purkhaar pe laTka ke sulagte phande

qatra-e-ab shararon ka gala ghonT aaya

aaj phir zabt-e-rag-e-jaan se nikal kar 'nayab'

dard ke jalte dayaron ka gala ghonT aaya