gham ke har ek rang se mujhko shanasa kar gaya

ġham ke har ik rang se mujh ko shanāsā kar gayā

vo mirā mohsin mujhe patthar se hiirā kar gayā

ghūrtā thā maiñ ḳhalā meñ to sajī thiiñ mahfileñ

merā āñkhoñ kā jhapaknā mujh ko tanhā kar gayā

har taraf uḌne lagā tārīk sāyoñ kā ġhubār

shaam kā jhoñkā chamaktā shahr mailā kar gayā

chaaT lī kirnoñ ne mere jism kī saarī miThās

maiñ samundar thā vo sūraj mujh ko sahrā kar gayā

ek lamhe meñ bhare bāzār sone ho ga.e

ek chehra sab purāne zaḳhm taaza kar gayā

maiñ usī ke rābte meñ jis tarah malbūs thā

yuuñ vo dāman khīñch kar mujh ko barahna kar gayā

raat bhar ham raushnī kī aas meñ jaage 'adīm'

aur din aayā to āñkhoñ meñ añdherā kar gayā

gham ke har ek rang se mujh ko shanasa kar gaya

wo mera mohsin mujhe patthar se hira kar gaya

ghurta tha main KHala mein to saji thin mahfilen

mera aankhon ka jhapakna mujh ko tanha kar gaya

har taraf uDne laga tarik sayon ka ghubar

sham ka jhonka chamakta shahr maila kar gaya

chaT li kirnon ne mere jism ki sari miThas

main samundar tha wo suraj mujh ko sahra kar gaya

ek lamhe mein bhare bazar sone ho gae

ek chehra sab purane zaKHm taza kar gaya

main usi ke rabte mein jis tarah malbus tha

yun wo daman khinch kar mujh ko barahna kar gaya

raat bhar hum raushni ki aas mein jage 'adim'

aur din aaya to aankhon mein andhera kar gaya