gham ke sae apni qamat se siwa kaise hue

ġham ke saa.e apnī qāmat se sivā kaise hue

shahr-e-ġham meñ itne hangāma bapā kaise hue

ḳhvāb in āñkhoñ se yā-rab kaun chun kar le gayā

'aks har manzar ke mahrūm-e-hinā kaise hue

aap ke dāman se kyoñ aa.ī kaf-e-qātil kī bū

aap munsif the to mauzū'-e-sazā kaise hue

halqa-e-zanjīr TuuTā sūrat-e-āb-e-ravāñ

phuul jaise haath ḳhanjar-āzmā kaise hue

nā-sipāsī dil kī fitrat thī magar hairat meñ huuñ

haath apne aaj masrūf-e-du'ā kaise hue

log apnī kaj-kulāhī par bahut sarshār the

maslahat ke sāmne be-dast-o-pā kaise hue

dekhnā ye saiqal-e-ġham kā karishma hai 'suhail'

zang-ālūda the rashk-e-ā.ina kaise hue

gham ke sae apni qamat se siwa kaise hue

shahr-e-gham mein itne hangama bapa kaise hue

KHwab in aankhon se ya-rab kaun chun kar le gaya

'aks har manzar ke mahrum-e-hina kaise hue

aap ke daman se kyon aai kaf-e-qatil ki bu

aap munsif the to mauzu'-e-saza kaise hue

halqa-e-zanjir TuTa surat-e-ab-e-rawan

phul jaise hath KHanjar-azma kaise hue

na-sipasi dil ki fitrat thi magar hairat mein hun

hath apne aaj masruf-e-du'a kaise hue

log apni kaj-kulahi par bahut sarshaar the

maslahat ke samne be-dast-o-pa kaise hue

dekhna ye saiqal-e-gham ka karishma hai 'suhail'

zang-aluda the rashk-e-aina kaise hue