gham ke tapte hue sahra se nikale mujhko

ġham ke tapte hue sahrā se nikāle mujh ko

kyā koī hai jo nigāhoñ meñ chhupā le mujh ko

kaisī ma.asūm tamannā hai dil-e-nādāñ kī

maiñ jo bikhrūñ to vahī aa ke sañbhāle mujh ko

rasm-e-ulfat to kabhī vo bhī nibhā.e aa kar

maiñ ḳhafā huuñ to kabhī vo bhī manā le mujh ko

tū mujhe chhoḌ ke gumnām na ho jaa.e kahīñ

terī pahchān huuñ māthe pe sajā le mujh ko

terī mahfil meñ añdhere kī shikāyat kyoñ ho

maiñ tirā diip huuñ jab chāhe jalā le mujh ko

terī halkī sī tavajjoh bhī mujhe kaafī hai

be-ruḳhī terī kahīñ maar na Daale mujh ko

thak ke ruknā rah-e-ulfat meñ sitam hai anvar

dars dete haiñ mire paañv ke chhāle mujh ko

gham ke tapte hue sahra se nikale mujh ko

kya koi hai jo nigahon mein chhupa le mujh ko

kaisi masum tamanna hai dil-e-nadan ki

main jo bikhrun to wahi aa ke sanbhaale mujh ko

rasm-e-ulfat to kabhi wo bhi nibhae aa kar

main KHafa hun to kabhi wo bhi mana le mujh ko

tu mujhe chhoD ke gumnam na ho jae kahin

teri pahchan hun mathe pe saja le mujh ko

teri mahfil mein andhere ki shikayat kyon ho

main tera dip hun jab chahe jala le mujh ko

teri halki si tawajjoh bhi mujhe kafi hai

be-ruKHi teri kahin mar na Dale mujh ko

thak ke rukna rah-e-ulfat mein sitam hai anwar

dars dete hain mere panw ke chhaale mujh ko