gham ki bhaTTi mein ba-sad-shauq utar jaunga

ġham kī bhaTTī meñ ba-sad-shauq utar jā.ūñgā

tap ke kundan sā maiñ ik roz nikhar jā.ūñgā

zindagī Dhañg se maiñ kar ke basar jā.ūñgā

kaam nekī ke zamāne meñ maiñ kar jā.ūñgā

mar ke jaanā hai kahāñ mujh ko nahīñ ye ma.alūm

rah ke duniyā meñ koī kaam to kar jā.ūñgā

ġham uThā lūñgā jo baḳhshegā zamāna mujh ko

tere dāman ko to ḳhushiyoñ se maiñ bhar jā.ūñgā

dekhtā jā.ūñgā muḌ muḌ ke tumhārī jānib

chhoḌ kar jab maiñ tumhārā ye nagar jā.ūñgā

ḳhaak par girne se miT jā.egī hastī merī

ban ke aañsū tire dāman pe Thahar jā.ūñgā

laakh be-rañg ho tasvīr jahāñ kī lekin

rañg tasvīr ke ḳhāke meñ maiñ bhar jā.ūñgā

tū ne ik baar haqārat se jo dekhā ai dost

maiñ zamāne kī nigāhoñ se utar jā.ūñgā

maiñ to baḌhtā hī rahūñgā rah-e-haq meñ ai 'nūr'

kyuuñ samajhtī hai ye duniyā ki maiñ Dar jā.ūñgā

gham ki bhaTTi mein ba-sad-shauq utar jaunga

tap ke kundan sa main ek roz nikhar jaunga

zindagi Dhang se main kar ke basar jaunga

kaam neki ke zamane mein main kar jaunga

mar ke jaana hai kahan mujh ko nahin ye malum

rah ke duniya mein koi kaam to kar jaunga

gham uTha lunga jo baKHshega zamana mujh ko

tere daman ko to KHushiyon se main bhar jaunga

dekhta jaunga muD muD ke tumhaari jaanib

chhoD kar jab main tumhaara ye nagar jaunga

KHak par girne se miT jaegi hasti meri

ban ke aansu tere daman pe Thahar jaunga

lakh be-rang ho taswir jahan ki lekin

rang taswir ke KHake mein main bhar jaunga

tu ne ek bar haqarat se jo dekha ai dost

main zamane ki nigahon se utar jaunga

main to baDhta hi rahunga rah-e-haq mein ai 'nur'

kyun samajhti hai ye duniya ki main Dar jaunga