gham ki garmi se dil pighalte rahe

ġham kī garmī se dil pighalte rahe

tajrabe āñsuoñ meñ Dhalte rahe

ek lamhe ko tum mile the magar

umr bhar dil ko ham masalte rahe

sub.h ke Dar se aañkh lag na sakī

raat bhar karvaTeñ badalte rahe

zahr thā zindagī ke kuuze meñ

jānte the magar nigalte rahe

dil rahā sarḳhushī se begāna

garche armāñ bahut nikalte rahe

apnā azm-e-safar na thā apnā

hukm miltā rahā to chalte rahe

zindagī sarḳhushī junūñ vahshat

maut ke naam kyuuñ badalte rahe

ho ga.e jin pe kārvāñ pāmāl

sab unhī rāstoñ pe chalte rahe

dil hī gar bā.is-e-halākat thā

ruḳh havāoñ ke kyuuñ badalte rahe

ho ga.e ḳhāmushī se ham ruḳhsat

saare ahbāb haath malte rahe

har ḳhushī 'arsh' vaj.h-e-dard banī

farsh-e-shabnam pe paañv jalte rahe

gham ki garmi se dil pighalte rahe

tajrabe aansuon mein Dhalte rahe

ek lamhe ko tum mile the magar

umr bhar dil ko hum masalte rahe

subh ke Dar se aankh lag na saki

raat bhar karwaTen badalte rahe

zahr tha zindagi ke kuze mein

jaante the magar nigalte rahe

dil raha sarKHushi se begana

garche arman bahut nikalte rahe

apna azm-e-safar na tha apna

hukm milta raha to chalte rahe

zindagi sarKHushi junun wahshat

maut ke nam kyun badalte rahe

ho gae jin pe karwan pamal

sab unhi raston pe chalte rahe

dil hi gar bais-e-halakat tha

ruKH hawaon ke kyun badalte rahe

ho gae KHamushi se hum ruKHsat

sare ahbab hath malte rahe

har KHushi 'arsh' wajh-e-dard bani

farsh-e-shabnam pe panw jalte rahe