gham mein Dubi subh phiki sham dekh

ġham meñ Duubī sub.h phīkī shaam dekh

iltifāt-e-gardish-e-ayyām dekh

zarf ḳhuddārī sharāfat ḳhāmushī

in kitāboñ meñ hamārā naam dekh

mai-kade meñ hai fazā-e-ashk-e-ġham

le rahā hai siskiyāñ har jaam dekh

shahr meñ garje to barse dasht meñ

daur-e-nau ke bādaloñ kā kaam dekh

ho ga.e vo mā.il-e-lutf-o-karam

sabr ke āġhāz kā anjām dekh

daane kī jānib na baḌh murġh-e-chaman

qaid kā sāmān zer-e-dām dekh

rāh-e-ġham meñ miltī hai kaisī ḳhushī

saath mere chal ke ik do gaam dekh

likh rahā hai har varaq par terā naam

ai 'qamar' apne qalam kā kaam dekh

gham mein Dubi subh phiki sham dekh

iltifat-e-gardish-e-ayyam dekh

zarf KHuddari sharafat KHamushi

in kitabon mein hamara nam dekh

mai-kade mein hai faza-e-ashk-e-gham

le raha hai siskiyan har jam dekh

shahr mein garje to barse dasht mein

daur-e-nau ke baadalon ka kaam dekh

ho gae wo mail-e-lutf-o-karam

sabr ke aaghaz ka anjam dekh

dane ki jaanib na baDh murgh-e-chaman

qaid ka saman zer-e-dam dekh

rah-e-gham mein milti hai kaisi KHushi

sath mere chal ke ek do gam dekh

likh raha hai har waraq par tera nam

ai 'qamar' apne qalam ka kaam dekh