gham nahin go ai falak rutba hai mujhko Khaar ka

ġham nahīñ go ai falak rutba hai mujh ko ḳhaar kā

āftāb ik zard pattā hai mire gulzār kā

zulf ke halqe meñ uljhā sabza gosh-e-yār kā

ho gayā sañg-e-zamurrad ḳhaal chashm-e-mār kā

nāḳhudā hai maut jo dam hai so hai bād-e-murād

azm hai kashtī-e-tan ko bahr-e-hastī yaar kā

ḳhāna-e-zanjīr se misl-e-sadā Dartā huuñ ab

yaad aatā hai kaf-e-pā meñ khaTaknā ḳhaar kā

josh-e-girya ne kiyā hai nā-tavāñ itnā mujhe

TūTnā mumkin nahīñ hai āñsuoñ ke taar kā

khā ga.ī āḳhir mujhe chashm-e-siyāh-e-surmagīñ

zarq qismat ne kiyā hai zañgī ādam-ḳhvār kā

sa.i-e-lā-hāsil mudāvā-e-marīz-e-ishq hai

thāmnā mumkin nahīñ girtī huī dīvār kā

haath qātil kā garebāñ tak pahuñch saktā nahīñ

aur fart-e-shauq hai yaañ zaḳhm dāmn-dār kā

phuul jo hai apne gulshan kā sipar kā phuul hai

har shajar is baaġh meñ laatā hai phal talvār kā

ḳhatt-e-rū-e-yār se iizā uThā.ī hai zi-bas

sabza se hotā hai sadma mere dil ko ḳhaar kā

garche pesh-e-tāq-e-abrū-e-sanam gesū nahīñ

ka.aba par narġha huā hai lashkar-e-kuffār kā

ai sanam terī karanjī aañkh se sābit huā

rañg uḌ jaatā hai rū-e-mardum-e-bīmār kā

yaad meñ terī raqīb-e-rū-siyah jaagā to kyā

martaba aalī na ho ḳhuffāsh-e-shab-bedār kā

us parī-rū ke jo kūche kā guzartā hai ḳhayāl

ban ke jin saaya lipTā hai mujhe dīvār kā

uTh ke dīvār-e-lahad se murde Takrāte haiñ sar

ik qayāmat hai sanam aalam tirī raftār kā

ḳham nadāmat se kiyā mehrāb meñ ka.aba ke sar

gardan-e-zāhid se bojh uTThā na jab zunnār kā

zindagī meñ be-adab hone na de tū ro.ab-e-husn

ḳhaak hai merī pas-az-marg aur dāman yaar kā

ai sanam āshiq se rūposhī nahīñ lāzim tujhe

parda muusā se nahīñ allāh ko dīdār kā

bū-e-gul 'ātish' kahīñ hotī hai mahsūs-e-nazar

iftirā hai roz-e-mahshar yaar ke dīdār kā

gham nahin go ai falak rutba hai mujh ko KHar ka

aaftab ek zard patta hai mere gulzar ka

zulf ke halqe mein uljha sabza gosh-e-yar ka

ho gaya sang-e-zamurrad KHal chashm-e-mar ka

naKHuda hai maut jo dam hai so hai baad-e-murad

azm hai kashti-e-tan ko bahr-e-hasti yar ka

KHana-e-zanjir se misl-e-sada Darta hun ab

yaad aata hai kaf-e-pa mein khaTakna KHar ka

josh-e-girya ne kiya hai na-tawan itna mujhe

TuTna mumkin nahin hai aansuon ke tar ka

kha gai aaKHir mujhe chashm-e-siyah-e-surmagin

zarq qismat ne kiya hai zangi aadam-KHwar ka

sai-e-la-hasil mudawa-e-mariz-e-ishq hai

thamna mumkin nahin girti hui diwar ka

hath qatil ka gareban tak pahunch sakta nahin

aur fart-e-shauq hai yan zaKHm damn-dar ka

phul jo hai apne gulshan ka sipar ka phul hai

har shajar is bagh mein lata hai phal talwar ka

KHatt-e-ru-e-yar se iza uThai hai zi-bas

sabza se hota hai sadma mere dil ko KHar ka

garche pesh-e-taq-e-abru-e-sanam gesu nahin

kaba par nargha hua hai lashkar-e-kuffar ka

ai sanam teri karanji aankh se sabit hua

rang uD jata hai ru-e-mardum-e-bimar ka

yaad mein teri raqib-e-ru-siyah jaga to kya

martaba aali na ho KHuffash-e-shab-bedar ka

us pari-ru ke jo kuche ka guzarta hai KHayal

ban ke jin saya lipTa hai mujhe diwar ka

uTh ke diwar-e-lahad se murde Takraate hain sar

ek qayamat hai sanam aalam teri raftar ka

KHam nadamat se kiya mehrab mein kaba ke sar

gardan-e-zahid se bojh uTTha na jab zunnar ka

zindagi mein be-adab hone na de tu roab-e-husn

KHak hai meri pas-az-marg aur daman yar ka

ai sanam aashiq se ruposhi nahin lazim tujhe

parda musa se nahin allah ko didar ka

bu-e-gul 'atish' kahin hoti hai mahsus-e-nazar

iftira hai roz-e-mahshar yar ke didar ka