gham nahin hai chahe jitni tirgi qaem rahe

ġham nahīñ hai chāhe jitnī tīrgī qaa.em rahe

mujh pe bas terī nazar kī chāñdnī qaa.em rahe

is liye oḌhe hue huuñ maiñ ḳhizāoñ kī ridā

mere gulshan kī fazā meñ tāzgī qaa.em rahe

ham-nashīñ itnā batā de kyā karūñ tere baġhair

kis tarah sāñsoñ se aarī zindagī qaa.em rahe

rañg-e-ulfat kī baqā ke vāste mere ḳhudā

āshiqī qaa.em rahe aur dilbarī qaa.em rahe

khāre paanī kā samundar yuuñ huā mujh ko atā

umr bhar hoñToñ pe mere tishnagī qaa.em rahe

jab harīf-e-jāñ hī dil kī dhaḌkanoñ meñ aa base

ġhair mumkin hai kisī se dostī qaa.em rahe

bo.e 'mīnā' raat ke khetoñ meñ yuuñ sūraj ke biij

apnī koshish hai jahāñ meñ raushnī qaa.em rahe

gham nahin hai chahe jitni tirgi qaem rahe

mujh pe bas teri nazar ki chandni qaem rahe

is liye oDhe hue hun main KHizaon ki rida

mere gulshan ki faza mein tazgi qaem rahe

ham-nashin itna bata de kya karun tere baghair

kis tarah sanson se aari zindagi qaem rahe

rang-e-ulfat ki baqa ke waste mere KHuda

aashiqi qaem rahe aur dilbari qaem rahe

khaare pani ka samundar yun hua mujh ko ata

umr bhar honTon pe mere tishnagi qaem rahe

jab harif-e-jaan hi dil ki dhaDkanon mein aa base

ghair mumkin hai kisi se dosti qaem rahe

boe 'mina' raat ke kheton mein yun suraj ke bij

apni koshish hai jahan mein raushni qaem rahe