gham nahin jo phul itne roz murjhate rahe

ġham nahīñ jo phuul itne roz murjhāte rahe

qāfile phūloñ ke gulshan meñ na.e aate rahe

jab talak apne charāġh-e-ārzū jalte rahe

be-ḳhatar tārīk rāhoñ par bhī ham chalte rahe

apnī barbādī kā baa.is ham kisī ko kyā kaheñ

apne rahzan ḳhud bane aur ḳhud hī ham luTte rahe

zindagī kī zulmateñ baḌhtī rahīñ baḌhtī rahīñ

saikḌoñ ḳhurshīd-o-māh niklā kiye Dhalte rahe

the sharīk-e-bazm apne māh-o-anjum kahkashāñ

ham sukūt-e-bāhamī se guftugū karte rahe

farq aatā hai nahīñ dīvār ke qad meñ zarā

saa.e us ke ḳhud hī simTe ḳhud hī vo baḌhte rahe

ḳhud se hī hai kāñptā is daur meñ ab har koī

jis tarah ġhāroñ meñ pahle aadmī Darte rahe

zindagī kī tābnākī daulat-o-sarvat se kyoñ

chhichhle dariyā roz hī baḌhte rahe ghaTte rahe

ilm-o-dānish ke tanāze' ḳhuun ke dariyā bane

ābyārī jehl ke paudoñ kī vo karte rahe

kāvisheñ terī ye sab barq-e-sitam bekār haiñ

āshiyāñ jalte ga.e aur āshiyāñ bante rahe

gham nahin jo phul itne roz murjhate rahe

qafile phulon ke gulshan mein nae aate rahe

jab talak apne charagh-e-arzu jalte rahe

be-KHatar tarik rahon par bhi hum chalte rahe

apni barbaadi ka bais hum kisi ko kya kahen

apne rahzan KHud bane aur KHud hi hum luTte rahe

zindagi ki zulmaten baDhti rahin baDhti rahin

saikDon KHurshid-o-mah nikla kiye Dhalte rahe

the sharik-e-bazm apne mah-o-anjum kahkashan

hum sukut-e-bahami se guftugu karte rahe

farq aata hai nahin diwar ke qad mein zara

sae us ke KHud hi simTe KHud hi wo baDhte rahe

KHud se hi hai kanpta is daur mein ab har koi

jis tarah ghaaron mein pahle aadmi Darte rahe

zindagi ki tabnaki daulat-o-sarwat se kyon

chhichhle dariya roz hi baDhte rahe ghaTte rahe

ilm-o-danish ke tanaze' KHun ke dariya bane

aabyari jehl ke paudon ki wo karte rahe

kawishen teri ye sab barq-e-sitam bekar hain

aashiyan jalte gae aur aashiyan bante rahe