gham tera jalwa-gah-e-kaun-o-makan hai ki jo tha

ġham tirā jalva-gah-e-kaun-o-makāñ hai ki jo thā

ya.anī insān vahī sho.ala-ba-jāñ hai ki jo thā

phir vahī rañg-e-takallum nigah-e-nāz meñ hai

vahī andāz vahī husn-e-bayāñ hai ki jo thā

kab hai inkār tire lutf-o-karam se lekin

tū vahī dushman-e-dil dushman-e-jāñ hai ki jo thā

ishq afsurda nahīñ aaj bhī afsurda bahut

vahī kam kam asar-e-soz-e-nihāñ hai ki jo thā

qurb hī kam hai na duurī hī ziyāda lekin

aaj vo rabt kā ehsās kahāñ hai ki jo thā

nazar aa jaate haiñ tum ko to bahut nāzuk baal

dil mirā kyā vahī ai shīsha-girāñ hai ki jo thā

jaan de baiThe the ik baar havas vaale bhī

phir vahī marhala-e-sūd-o-ziyāñ hai ki jo thā

husn ko khīñch to letā hai abhī tak lekin

vo asar jazb-e-mohabbat meñ kahāñ hai ki jo thā

aaj bhī said-gah-e-ishq meñ husn-e-saffāk

liye abrū kī lachaktī sī kamāñ hai ki jo thā

phir tirī chashm-e-suḳhan-sanj ne chheḌī koī baat

vahī jaadū hai vahī husn-e-bayāñ hai ki jo thā

phir sar-e-mai-kada-e-ishq hai ik bārish-e-nūr

chhalke jāmoñ se charāġhāñ kā samāñ hai ki jo thā

phir vahī ḳhair-nigāhī hai tire jalvoñ se

vahī aalam tirā ai barq-e-damāñ hai ki jo thā

aaj bhī aag dabī hai dil-e-insāñ meñ 'firāq'

aaj bhī sīnoñ se uThtā vo dhuāñ hai ki jo thā

gham tera jalwa-gah-e-kaun-o-makan hai ki jo tha

yani insan wahi shoala-ba-jaan hai ki jo tha

phir wahi rang-e-takallum nigah-e-naz mein hai

wahi andaz wahi husn-e-bayan hai ki jo tha

kab hai inkar tere lutf-o-karam se lekin

tu wahi dushman-e-dil dushman-e-jaan hai ki jo tha

ishq afsurda nahin aaj bhi afsurda bahut

wahi kam kam asar-e-soz-e-nihan hai ki jo tha

qurb hi kam hai na duri hi ziyaada lekin

aaj wo rabt ka ehsas kahan hai ki jo tha

nazar aa jate hain tum ko to bahut nazuk baal

dil mera kya wahi ai shisha-giran hai ki jo tha

jaan de baiThe the ek bar hawas wale bhi

phir wahi marhala-e-sud-o-ziyan hai ki jo tha

husn ko khinch to leta hai abhi tak lekin

wo asar jazb-e-mohabbat mein kahan hai ki jo tha

aaj bhi said-gah-e-ishq mein husn-e-saffak

liye abru ki lachakti si kaman hai ki jo tha

phir teri chashm-e-suKHan-sanj ne chheDi koi baat

wahi jadu hai wahi husn-e-bayan hai ki jo tha

phir sar-e-mai-kada-e-ishq hai ek barish-e-nur

chhalke jamon se charaghan ka saman hai ki jo tha

phir wahi KHair-nigahi hai tere jalwon se

wahi aalam tera ai barq-e-daman hai ki jo tha

aaj bhi aag dabi hai dil-e-insan mein 'firaq'

aaj bhi sinon se uThta wo dhuan hai ki jo tha