ghamon ke andheron mein gharqab hun main

ġhamoñ ke añdheroñ meñ ġharqāb huuñ maiñ

amāvas kā bikhrā huā ḳhvāb huuñ maiñ

mire naam se hai zamāne ko nafrat

ki pyāle meñ hastī ke zahrāb huuñ maiñ

jamī hai umīdoñ pe hirmāñ kī kaa.ī

ki sahrā kā ik ḳhushk tālāb huuñ maiñ

qalam-band haiñ jis meñ rūhoñ ke qisse

kitāb-e-zamāna kā vo baab huuñ maiñ

paḌā hai jo khaa.ī meñ tārīkiyoñ kī

murādoñ kā vo naḳhl-e-shādāb huuñ maiñ

tujhe ziist kī har ḳhushī ho mayassar

mirā ġham na kar shād-o-shādāb huuñ maiñ

ta.āruf mirā kyā hai pūchho na 'parkāsh'

vafā naam hai aur nāyāb huuñ maiñ

ghamon ke andheron mein gharqab hun main

amawas ka bikhra hua KHwab hun main

mere nam se hai zamane ko nafrat

ki pyale mein hasti ke zahrab hun main

jami hai umidon pe hirman ki kai

ki sahra ka ek KHushk talab hun main

qalam-band hain jis mein ruhon ke qisse

kitab-e-zamana ka wo bab hun main

paDa hai jo khai mein tarikiyon ki

muradon ka wo naKHl-e-shadab hun main

tujhe zist ki har KHushi ho mayassar

mera gham na kar shad-o-shadab hun main

taaruf mera kya hai puchho na 'parkash'

wafa nam hai aur nayab hun main