ghamon ke phul sar-e-shaKH muskuraate hain

ġhamoñ ke phuul sar-e-shāḳh muskurāte haiñ

udāsiyoñ ke ye mausam kahāñ se aate haiñ

bichhaḌne vāloñ ko ilzām kyoñ diyā jaa.e

diloñ kā kyā hai binā baat TuuT jaate haiñ

tirā ḳhayāl jo badlā junūñ meñ hosh aayā

ye rāste to kahīñ aur le ke jaate haiñ

phir ek shaam tire sang ḳhud ko bhuul aa.e

sunāne vaale ka.ī dāstāñ sunāte haiñ

koī to saath chale manziloñ kā sukh dekhe

yahāñ to biich meñ hī log chhoḌ jaate haiñ

ye kaise ḳhauf hamāre diloñ se chimTe haiñ

ye kaise dil haiñ jinheñ vāhime satāte haiñ

Dhale haiñ qālib-e-īzā meñ is tarah ham log

ab apne ḳhud ke hī zaḳhmoñ se haz uThāte haiñ

baras ke yaad ke bādal hameñ jalāte haiñ

ye kaisī aag hai kaise ise bujhāte haiñ

haiñ vo bhī log jahāñ meñ kisī kā dukh ho ki saath

jo umr bhar kā ghaḌī bhar meñ bhuul jaate haiñ

vo jin ko ham nazar-andāz karte jaate haiñ

phir ek din unheñ maujūd dil meñ paate haiñ

koī batā.e ki jab saath ho nayā chehra

purāne chehre se kaise nazar milāte haiñ

bhare haiñ aise nazar meñ tire nuqūsh ke rang

koī bhī chehra ho ham tum ko DhūñD laate haiñ

hisār-e-shām meñ kuchh ajnabī se saa.e haiñ 'shams'

ḳhamoshiyoñ ke nagar meñ hameñ bulāte haiñ

ghamon ke phul sar-e-shaKH muskuraate hain

udasiyon ke ye mausam kahan se aate hain

bichhaDne walon ko ilzam kyon diya jae

dilon ka kya hai bina baat TuT jate hain

tera KHayal jo badla junun mein hosh aaya

ye raste to kahin aur le ke jate hain

phir ek sham tere sang KHud ko bhul aae

sunane wale kai dastan sunate hain

koi to sath chale manzilon ka sukh dekhe

yahan to bich mein hi log chhoD jate hain

ye kaise KHauf hamare dilon se chimTe hain

ye kaise dil hain jinhen wahime satate hain

Dhale hain qalib-e-iza mein is tarah hum log

ab apne KHud ke hi zaKHmon se haz uThate hain

baras ke yaad ke baadal hamein jalate hain

ye kaisi aag hai kaise ise bujhate hain

hain wo bhi log jahan mein kisi ka dukh ho ki sath

jo umr bhar ka ghaDi bhar mein bhul jate hain

wo jin ko hum nazar-andaz karte jate hain

phir ek din unhen maujud dil mein pate hain

koi batae ki jab sath ho naya chehra

purane chehre se kaise nazar milate hain

bhare hain aise nazar mein tere nuqush ke rang

koi bhi chehra ho hum tum ko DhunD late hain

hisar-e-sham mein kuchh ajnabi se sae hain 'shams'

KHamoshiyon ke nagar mein hamein bulate hain