ghamon ki dhup mein uf mahtab se chehre

ġhamoñ kī dhuup meñ uf māhtāb se chehre

jhulas ke rah ga.e kyā kyā gulāb se chehre

likhī huī nazar aa.iiñ hikāyateñ kyā kyā

paḌhe jo ġhaur se ham ne kitāb se chehre

matā-e-nūr masā.ib ne luuT lī shāyad

dikhā.ī dete haiñ be-āb-o-tāb se chehre

ye sochtā huuñ kise mo'atabar kahā jaa.e

nazar meñ jitne haiñ sab haiñ sarāb se chehre

jo inqilāb-e-zamāna se ho ga.e rū-posh

ḳhayāl meñ haiñ vahī lā-javāb se chehre

girā hai jab bhī sitāra koī bulandī se

ubhar ke zehn pe aa.e shahāb se chehre

nazar ke sāmne rahte the jo kabhī 'ahmad'

vahī to rah ga.e sab ho ke ḳhvāb se chehre

ghamon ki dhup mein uf mahtab se chehre

jhulas ke rah gae kya kya gulab se chehre

likhi hui nazar aain hikayaten kya kya

paDhe jo ghaur se hum ne kitab se chehre

mata-e-nur masaib ne luT li shayad

dikhai dete hain be-ab-o-tab se chehre

ye sochta hun kise mo'atabar kaha jae

nazar mein jitne hain sab hain sarab se chehre

jo inqilab-e-zamana se ho gae ru-posh

KHayal mein hain wahi la-jawab se chehre

gira hai jab bhi sitara koi bulandi se

ubhar ke zehn pe aae shahab se chehre

nazar ke samne rahte the jo kabhi 'ahmad'

wahi to rah gae sab ho ke KHwab se chehre