ghamon mein Dhaal gaya lauT kar nahin aata

ġhamoñ meñ Dhaal gayā lauT kar nahīñ aatā

jo pichhle saal gayā lauT kar nahīñ aayā

bichhaḌ gayā hai vo ḳhushiyāñ sameT kar aur ġham

mujhe sambhāl gayā lauT kar nahīñ aayā

ajab tilism hai us kī hasīn āñkhoñ meñ

udhar ḳhayāl gayā lauT kar nahīñ aayā

maiñ ḳhud bhī soch meñ gum huuñ ki tere aane se

kidhar malāl gayā lauT kar nahīñ aayā

ajiib shaḳhs thā khiñch kar salīb-e-vaqt pe vo

hameñ ujaal gayā lauT kar nahīñ aayā

kaTā vo shahr se phir jab tirī galī se kaTā

shikasta haal gayā lauT kar nahīñ aayā

sitam-zarīf rivājoñ kī oT meñ ai 'ayāz'

mirā hilāl gayā lauT kar nahīñ aayā

ghamon mein Dhaal gaya lauT kar nahin aata

jo pichhle sal gaya lauT kar nahin aaya

bichhaD gaya hai wo KHushiyan sameT kar aur gham

mujhe sambhaal gaya lauT kar nahin aaya

ajab tilism hai us ki hasin aankhon mein

udhar KHayal gaya lauT kar nahin aaya

main KHud bhi soch mein gum hun ki tere aane se

kidhar malal gaya lauT kar nahin aaya

ajib shaKHs tha khinch kar salib-e-waqt pe wo

hamein ujal gaya lauT kar nahin aaya

kaTa wo shahr se phir jab teri gali se kaTa

shikasta haal gaya lauT kar nahin aaya

sitam-zarif riwajon ki oT mein ai 'ayaz'

mera hilal gaya lauT kar nahin aaya