ghanim se bhi adawat mein had nahin mangi

ġhanīm se bhī adāvat meñ had nahīñ māñgī

ki haar maan lī lekin madad nahīñ māñgī

hazār shukr ki ham ahl-e-harf-e-zindā ne

mujāvirān-e-adab se sanad nahīñ māñgī

bahut hai lamha-e-maujūd kā sharaf bhī mujhe

so apne fan se baqā-e-abad nahīñ māñgī

qubūl vo jise kartā vo iltijā nahīñ kī

duā jo vo na kare mustarad nahīñ māñgī

maiñ apne jāma-e-sad-chāk se bahut ḳhush huuñ

kabhī abā-o-qabā-e-ḳhirad nahīñ māñgī

shahīd jism salāmat uThā.e jaate haiñ

jabhī to gor-kanoñ se lahad nahīñ māñgī

maiñ sar-barahna rahā phir bhī sar-kashīda rahā

kabhī kulāh se tauqīr-e-qad nahīñ māñgī

atā-e-dard meñ vo bhī nahīñ thā dil kā ġharīb

'farāz' maiñ ne bhī baḳhshish meñ had nahīñ māñgī

ghanim se bhi adawat mein had nahin mangi

ki haar man li lekin madad nahin mangi

hazar shukr ki hum ahl-e-harf-e-zinda ne

mujaviran-e-adab se sanad nahin mangi

bahut hai lamha-e-maujud ka sharaf bhi mujhe

so apne fan se baqa-e-abad nahin mangi

qubul wo jise karta wo iltija nahin ki

dua jo wo na kare mustarad nahin mangi

main apne jama-e-sad-chaak se bahut KHush hun

kabhi aba-o-qaba-e-KHirad nahin mangi

shahid jism salamat uThae jate hain

jabhi to gor-kanon se lahad nahin mangi

main sar-barahna raha phir bhi sar-kashida raha

kabhi kulah se tauqir-e-qad nahin mangi

ata-e-dard mein wo bhi nahin tha dil ka gharib

'faraaz' main ne bhi baKHshish mein had nahin mangi