gar dil mein tabassum ka ek tir utar jae

gar dil meñ tabassum kā ik tiir utar jaa.e

nau-ḳhāsta ġhunche kī taqdīr sañvar jaa.e

jab jab koī tūfāñ sā is dil se guzar jaa.e

vo chehra-e-rañgīñ bhī kuchh aur nikhar jaa.e

jab dil pe mohabbat kā tūfān guzar jaa.e

shabnam se sharar Tapke sho.aloñ se asar jaa.e

dīvāna tire ruḳh kā aur maut se Dar jaa.e

jis dil meñ sadāqat ho mumkin nahīñ mar jaa.e

ye ḳhūn-e-mohabbat hai ḳhanjar na Thahar jaa.e

ik mahshar-e-betābī rag rag meñ utar jaa.e

ye rāh-e-mohabbat hai jo is se guzar jaa.e

parvāh nahīñ us ko zar jaa.e ki sar jaa.e

ulfat kī zafar-mandī us roz maiñ samjhūñgā

jab aah mirī tere siine meñ utar jaa.e

is dil pe guzartī hai kaifiyat-e-rañgā-rañg

tūfāñ sā umaD aa.e dariyā sā utar jaa.e

hai ḳhuub magar phir bhī vo paikar-e-rañg-o-bū

kuchh aur nikhar jaa.e kuchh aur sañvar jaa.e

kyā turfa-tamāshā hai faizān-e-mohabbat se

jannat se bashar nikle jannat meñ bashar jaa.e

gar dil mein tabassum ka ek tir utar jae

nau-KHasta ghunche ki taqdir sanwar jae

jab jab koi tufan sa is dil se guzar jae

wo chehra-e-rangin bhi kuchh aur nikhar jae

jab dil pe mohabbat ka tufan guzar jae

shabnam se sharar Tapke shoalon se asar jae

diwana tere ruKH ka aur maut se Dar jae

jis dil mein sadaqat ho mumkin nahin mar jae

ye KHun-e-mohabbat hai KHanjar na Thahar jae

ek mahshar-e-betabi rag rag mein utar jae

ye rah-e-mohabbat hai jo is se guzar jae

parwah nahin us ko zar jae ki sar jae

ulfat ki zafar-mandi us roz main samjhunga

jab aah meri tere sine mein utar jae

is dil pe guzarti hai kaifiyat-e-ranga-rang

tufan sa umaD aae dariya sa utar jae

hai KHub magar phir bhi wo paikar-e-rang-o-bu

kuchh aur nikhar jae kuchh aur sanwar jae

kya turfa-tamasha hai faizan-e-mohabbat se

jannat se bashar nikle jannat mein bashar jae