gar ek raat guzar yan wo rashk-e-mah kare

gar ek raat guzar yaañ vo rashk-e-māh kare

ajab nahīñ ki gadā par karam jo shaah kare

dikhāve aa.ina kis muñh se us ko muñh apnā

ki āftāb ko juuñ sham-e-sub.h-gāh kare

muqābil aate hī yuuñ khīñch le hai dil vo shoḳh

ki jaise kāh-rubā jazb barg kaah kare

havās-o-hosh ko chhoḌ aap dil gayā us paas

jab ahl-e-fauj hī mil jaa.eñ kyā sipāh kare

sitam-shi.ār vafā-dushman āshnā-bezār

kaho to aise se kyūñkar koī nibāh kare

ka.ī taḌapte haiñ āshiq ka.ī sisakte haiñ

is aarzū meñ ki vo sañg-dil nigāh kare

mohabbat aise kī 'bedār' saḳht mushkil hai

jo apnī jaan se guzre vo us kī chaah kare

gar ek raat guzar yan wo rashk-e-mah kare

ajab nahin ki gada par karam jo shah kare

dikhawe aaina kis munh se us ko munh apna

ki aaftab ko jun sham-e-subh-gah kare

muqabil aate hi yun khinch le hai dil wo shoKH

ki jaise kah-ruba jazb barg kah kare

hawas-o-hosh ko chhoD aap dil gaya us pas

jab ahl-e-fauj hi mil jaen kya sipah kare

sitam-shiar wafa-dushman aashna-bezar

kaho to aise se kyunkar koi nibah kare

kai taDapte hain aashiq kai sisakte hain

is aarzu mein ki wo sang-dil nigah kare

mohabbat aise ki 'bedar' saKHt mushkil hai

jo apni jaan se guzre wo us ki chah kare